Bloomberg
Presidenti rus Vladimir Putin po planifikon një sulm të ri kundër Ukrainës në shkurt ose mars, sipas një raporti të detajuar nga Bloomberg. Në të njëjtën kohë, ai po përgatit vendin e tij për një konflikt me Perëndimin që pritet të zgjasë me vite.
Gati një vit pas pushtimit, Kremlini synon të dëshmojë se forcat e tij mund të rimarrin iniciativën pas muajsh humbjesh, duke ushtruar presion mbi Kievin dhe mbështetësit e tij për të rënë dakord për një lloj armëpushimi që do të ndihmonte Rusinë të kontrollonte territorin që zotëron tani, sipas zyrtarëve, këshilltarëve dhe të tjerëve të njohur me situatën.
Bloomberg thekson se edhe Putin nuk mund të mohojë dobësitë e ushtrisë që ai ka ndërtuar për dekada, pasi trupat e tij humbën më shumë se gjysmën e fitoreve të tyre fillestare në Ukrainë.
Dështimet e vazhdueshme kanë detyruar shumë në Kremlin të bëhen më realistë për ambiciet e tyre të menjëhershme, duke pranuar se edhe ruajtja e frontit ekzistues do të jetë një arritje, raporton abcnews.al.
Por vetë Putin mbetet i bindur se forcat më të mëdha dhe toleranca e Rusisë për viktimat, tashmë në dhjetëra mijëra, më shumë se në çdo konflikt që nga Lufta e Dytë Botërore, sipas vlerësimeve të SHBA dhe Europës do ta lejojnë atë të mbizotërojë pavarësisht dështimeve të deritanishme.
Ofensiva e re mund të fillojë në shkurt ose mars. Komentet e tyre konfirmojnë paralajmërimet nga Ukraina dhe aleatët e saj se një ofensivë e re ruse po vjen dhe sugjerojnë se ajo mund të fillojë përpara se Kievi të marrë furnizimet me tanke amerikane dhe europiane të premtuara nga Uashingtoni, Berlini dhe qeveritë e tjera në Perëndim.
Vendosmëria e Putinit parashikon një tjetër përshkallëzim vdekjeprurës në luftën e tij, pasi Kievi gjithashtu përgatit një ofensivë të re të tij për të larguar forcat pushtuese, duke hedhur poshtë çdo armëpushim që lejon Rusinë të mbajë territorin ukrainas, raporton abcnews.al.
Lideri rus beson se nuk ka alternativë veçse të triumfojë në atë që ai e sheh si një konflikt ekzistencial me SHBA-në dhe aleatët e saj. Një raund i ri rekrutimi ka të ngjarë në pranverë, thanë ata, pasi ekonomia dhe shoqëria ruse po bëhen gjithnjë e më shumë në varësi të nevojave të luftës.
“Putin është i zhgënjyer me mënyrën se si po shkojnë gjërat, por ai nuk është gati të heqë dorë nga qëllimet e tij,” tha Tatyana Stanovaya, një eksperte e politikës.
Zyrtarët ushtarakë amerikanë dhe europianë kanë frikë se konflikti së shpejti mund të shkojë në një betejë të stilit të Luftës së Parë Botërore, një skenar që mund të favorizojë Rusinë, falë popullsisë së saj më të madhe dhe industrisë ushtarake.
“Nëse asgjë nuk ndryshon, një luftë rrënimi si Lufta e Parë Botërore po afrohet, e cila mund të zgjasë për një kohë të gjatë, sepse të dyja palët besojnë se koha është në anën e tyre,” tha Andrei Kortunov, kreu i Këshillit për Marrëdhëniet Ndërkombëtare të Rusisë, i krijuar nga Kremlini.
“Putini është i sigurt se ose Perëndimi ose Ukraina do të lodhen,” paralajmëroi ai.
