Këshilltari i Sigurisë Kombëtare të SHBA-së, Mike Waltz, deklaroi se Ukraina duhet të rishqyrtojë qëndrimin e saj ndaj qasjes së administratës Trump për bisedimet e paqes me Rusinë.
Duke folur për Fox News, Waltz tha se presidenti ukrainas Volodymyr Zelenskyy duhet të ulë tonin e kritikave ndaj SHBA-së dhe të vlerësojë seriozisht një marrëveshje që përfshin transferimin e burimeve natyrore ukrainase në këmbim të mbështetjes amerikane.
Deklaratat e Ëaltz pasojnë komentet e presidentit Trump, i cili të mërkurën e quajti Zelenskyy-n “një diktator” dhe fajësoi Ukrainën për nisjen e luftës. Në kundërpërgjigje, Zelenskyy deklaroi se Trump po vepronte nën ndikimin e dezinformimit rus dhe kërkoi që administrata e tij të ishte “më e vërtetë” në qëndrimet e saj.
Ndërkohë, miliarderi Elon Musk, një nga figurat kryesore që mbështet agjendën e Trump, sulmoi Zelenskyy-n përmes rrjetit të tij social X, duke e akuzuar atë pa prova për korrupsion dhe për anulimin e zgjedhjeve për të ruajtur pushtetin.
Teksa administrata Trump ka rritur presionin mbi Ukrainën për të negociuar me Rusinë, të dërguarit amerikanë kanë anashkaluar Kievin në raundet e fundit të bisedimeve, duke zhvilluar takime me përfaqësues rusë në Riad, Arabinë Saudite. I dërguari special i Trump për Ukrainën, Keith Kellogg, anuloi papritur një konferencë për shtyp pas takimit me Zelenskyy-n, duke shtuar dhe më shumë aludimet për një krisje të marrëdhënieve.
