Milot Cakaj, zëvendësguvernatori për Mbikëqyrje Financiare i Bankës Qendrore të Republikës së Kosovës (BQK), ka zhvilluar një vizitë zyrtare në Autoritetin e Mbikëqyrjes Financiare të Republikës së Shqipërisë (AMF) me drejtoreshën e Përgjithshme Ekzekutive të AMF-së, Mimoza Kaçi.
Gjatë këtij takimi zëvendësguvernatori Cakaj dhe drejtoresha Kaçi u dakorduan për thellimin e bashkëpunimit në fusha të interesit të përbashkët përmes kolegjeve dhe trupave të përbashkëta.
BQK përmes një komunikate për media bënë të ditur se takimi është fokusuar në tema me interes të përbashkët, si qasja ndaj reformave të sektorit të sigurimeve që lidhen me IFRS 17, Solvenca II dhe edukimi financiar.
“Zëvendësguvernatori Cakaj gjatë takimit me Drejtoreshën e Përgjithshme Ekzekutive të AMF-së, znj. Mimoza Kaçi diskutoi mbi zhvillimet kryesore në tregun e sigurimeve dhe atë jo-bankar, duke përfshirë avancimin e kornizës ligjore e atë rregullatore dhe shkëmbimin e përvojave në fusha specifike që bien nën fushëveprimin e BQK-së dhe AMF-së”, thuhet në komunikatë.
Tutje thuhet se Kaçi po ashtu ka shprehur gatishmërinë e AMF-së për të ndarë përvojat dhe dhënë kontributin e tyre në çështjet me interes për BQK-në dhe proceset e saj.
Ndryshe rakimi në Tiranë është vazhdimësi e vizitës së drejtueses së AMF-së e realizuar në muajin shkurt në BQK, si dëshmi e marrëdhënieve të ngushta ndër-institucionale.
