Autori i librit “Porosia e kullës”, Pashko Camaj, në programin e mëngjesit në RTK, ka thënë se ky libër është një përshkrim i jetës së tij dhe shumë peripecive që kishte kaluar familja e tij.
Ai thotë se libri “Porosia e kullës” është një kujtim i jetës në vendin e tij, në Malësi, ku kishte jetuar 20-vjet.
Duke vazhduar rrëfimin për librin Camaj tregoi se çdo gjë e shkruar në këtë libër është pjesë nga jeta dhe sfidat e kaluar.
Ai tregoi se si ka kaluar kufirin në bagazhin e makinës bashkë më motrën e tij dhe një bashkëvendas për të arritur në Amerikë që priste që t’i jepte shumë mundësi në jetë, por që në fakt atje e priti një jetë shumë e vështirë.
“Në vitin 1985 isha vetëm 20 vjeçar dhe bashkë me motrën time dhe një bashkëvendas tonin kemi kaluar kufirin në bagazhin e makinës. Ishte shumë e vështirë, s’do të ia kisha uruar askujt por njeriu kur është i ri mund të kalojë shumë sfida në jetë për të arritur ëndrrën”, u shpreh Camaj.
Ai tha se libri “Porosia e Kullës” e mori titullin nga historia që i kishte treguar babai i tij për gjyshin.
“Kur ta lexoni librin keni me pa që një pjesë e librit është shkruar për jetën e babit dhe të gjyshit tim. Një ndër historitë e babës që e tregoj në libër është vrasja e gjyshit tim në vitin 1947. Gjyshi im ishte i njohur tek sistemi komunist dhe nuk ishte figurë e dëshirueshme për të dhe ata një mëngjes erdhën për me e marrë dhe amaneti që ai ju la ishte ‘bijtë e mi për kullën duhet të jetohet’”, tha ai.
Nder tjera Camaj thotë se njeriut në këtë botë i jepet mundësia që të arrijë dhe të kërkojë ëndrrat e veta, kudo që e dërgon jeta, pavarësisht se dhimbja është se largohesh nga vendi, por sipas tij, kjo nuk do të thotë se duhet të harrosh të kaluarën.
