Senati i Shtetit të Nju-Jorkut ka miratuar një rezolutë zyrtare që nderon Kosovën dhe përkujton 18-vjetorin e shpalljes së pavarësisë së saj.
Një rol të veçantë në këtë iniciativë ka pasur Senatorja Jessica Scarcella-Spanton, e cila është shprehur e lumtur që mund të mirëpresë përfaqësues të komunitetit kosovar në Kapitol. Ajo theksoi rëndësinë e ruajtjes dhe promovimit të kulturës dhe traditave kosovare në Nju-Jork.
“Jam e nderuar që edhe një herë po e promovoj këtë rezolutë dhe t’i mirëpres njerëzit e Kosovës në Kapitolin tonë për të festuar pavarësinë e tyre. Jam krenare që përfaqësoj një komunitet kaq të fortë kosovar këtu në SD23 dhe mbetem e përkushtuar të festoj kulturën dhe traditat e tyre së bashku me ta”, tha senatorja Scarcella-Spanton.
Rezoluta vlerëson arritjet historike të Kosovës, lidhjet e forta dypalëshe me Shtetet e Bashkuara dhe rolin e komunitetit kosovar në jetën sociale dhe kulturore të shtetit të Nju-Jorkut.
Fjalimi i saj në Senat:
Sot, edhe një herë, nderojmë rrugëtimin e jashtëzakonshëm të Kosovës drejt pavarësisë këtu në Nju Jork, një pavarësi e fituar me shumë sakrifica dhe me ndikim të thellë për popullin e saj. Populli i Kosovës, gjatë të gjitha sfidave dhe vështirësive që çuan drejt pavarësisë, ka treguar forcë dhe vendosmëri të jashtëzakonshme.
Shpallja e pavarësisë së Kosovës në vitin 2008 ishte një moment madhor në historinë moderne, duke shënuar fundin e viteve të tëra përpjekjesh dhe fillimin e një kapitulli të ri. Ndërsa reflektojmë mbi këtë rrugëtim, nderojmë sakrificat e bëra nga populli i Kosovës dhe përkushtimin e tyre të palodhur për liri.
Vazhdoj të konsideroj nder të sponsorizoj këtë rezolutë çdo vit, si shenjë njohjeje të Ditës së Pavarësisë së Kosovës. Sot festojmë arritjet e popullit kosovar dhe shohim përpara drejt një të ardhmeje të ndritur, si këtu në Nju Jork, ashtu edhe në vendlindjen e tyre, Kosovë.
Jam vazhdimisht krenare për popullin kosovar që përfaqësoj në Distriktin 23 të Senatit dhe për përkushtimin e tyre në ruajtjen e trashëgimisë dhe kulturës, pavarësisht se ku ndodhen në botë. Do të vazhdoj të punoj krah për krah me të gjithë njerëzit nga Kosova dhe komunitetin e tyre këtu në Nju Jork për shumë vite që do të vijnë.
