Iniciativa “CorrWatch” ka shprehur shpreh shqetësimin për, siç është thënë, mbyllje dhe mungesë të transparencës të Ministrisë së Financave, Punës dhe Transfereve dhe Ministrisë së Industrisë, Ndërmarrësisë dhe Tregtisë në proceset e rekrutimit për drejtor ekzekutiv të Agjencisë së Regjistrimit të Bizneseve të Kosovës në kuadër të MINT, sekretar të përgjithshëm në MFPT, drejtor ekzekutiv në Agjencinë e Punësimit të Republikës së Kosovës dhe drejtor ekzekutiv në Agjencinë Qendrore e Prokurimit.
“Edhe më parë, ‘CorrWatch’ ka reaguar lidhur me mbylljen dhe mungesën e transparencës së MFTP për proceset rekrutuese për pozitën e Drejtorit të Përgjithshëm të Administratës Tatimore të Kosovës (ATK) dhe pozitën e Sekretarit të Përgjithshëm në MFPT”, thuhet në një reagim të Iniciativës.
Në reagim theksohet se monitorimi i shoqërisë civile në procese të rekrutimit është i garantuar edhe me legjislacionin në fuqi.
“CorrWatch” ka bërë kërkesë për monitorimin e këtyre pozitave por se nuk janë njoftuar për asnjërën fazë të procedurës për pozitat e lartcekura.
“Në rastin e drejtorit ekzekutiv në Agjencinë e Punësimit, ‘Corrwatch’ është njoftuar që njësia përgjegjëse është duke pritur përgjigje nga ministri i MFPT. Për pozitën e drejtorit ekzekutiv në AQP dhe sekretarit të përgjithshëm në MFPT, ‘Corrwatch’ nuk ka marrë asnjë përgjigje si dhe nuk është njoftuar për ta monitoruar procesin. Në MINT janë përgjigjur se do të lejohet monitorimi vetëm në fazën e verifikimit paraprak. Megjithatë, edhe përkundër konfirmimit, ‘CorrWatch’ nuk është ftuar për monitorimin e fazën e verifikimit paraprak”, thuhet në reagim.
Mohimi i përfshirjes së shoqërisë civile nga këto ministri thuhet se është i kundërligjshëm, cenon garancitë e dhëna me ligj si dhe transparencën si njëra nga shtyllat kryesore të meritokracisë.
“Një praktikë e tillë rrezikon që këto procese të mbyllura të jenë subjekt i ndikimeve politike dhe personale, duke minuar kështu besimin e qytetarëve në institucionet publike. ‘CorrWatch’ u bën thirrje ministrive në fjalë që të zbatojnë ligjin dhe krijojnë mundësitë për qasje të hapur dhe të drejtë, ku monitorimi nga shoqëria civile të jetë i plotë dhe gjithëpërfshirës në të gjitha fazat e procesit të rekrutimit ashtu siç garantohet me ligj”, thuhet në reagim, shkruan rtk.Pjesë e Iniciativës “CorrWatch” janë Grupi për Studime Juridike dhe Politike (GLPS), Instituti GAP dhe organizata INDEP.
