Presidenti i shtatë i zgjedhur në mënyrë demokratike i Afrikës së Jugut, Cyril Ramaphosa, u betua zyrtarisht sot për një mandat të dytë në detyrë pas rizgjedhjes së tij nga parlamenti të premten e kaluar, raporton Anadolu, transmeton KosovaPost.
Shefi i drejtësisë Raymond Zondo administroi betimin në një ceremoni ku morën pjesë disa krerë shtetesh dhe qeverish në kryeqytetin Pretoria.
“Unë, Matamela Cyril Ramaphosa, betohem se do të jem besnik ndaj Republikës së Afrikës së Jugut”, tha 71-vjeçari në betimin e tij në detyrë.
Zondo e përgëzoi Ramaphosan dhe e prezantoi atë me audiencën pasi nënshkroi një certifikatë, duke thënë se presidenti i zgjedhur tani është betuar siç duhet.
Lutje ndërfetare u mbajtën përpara ceremonisë së betimit me krerët fetarë që u lutën për presidentin e ardhshëm dhe qeverinë e unitetit kombëtar.
Anëtarët e parlamentit të Afrikës së Jugut rizgjodhën Cyril Ramaphosan të premten e kaluar si president për një mandat të dytë gjatë seancës së parë të legjislaturës.
Ramaphosa, kreu i partisë së Kongresit Kombëtar Afrikan (ANC), mori 283 vota, duke mundur Julius Maleman të partisë “Luftëtari i Lirisë Ekonomike”, që mblodhi 44 vota.
ANC, dikur e udhëhequr nga ikona e të drejtave civile Nelson Mandela, ka dominuar politikën e Afrikës së Jugut për tri dekadat e fundit, derisa humbi shumicën e saj në zgjedhjet kombëtare të 29 majit.
ANC ka 159 ligjvënës në Asamblenë Kombëtare prej 400 anëtarësh, duke e bërë të vështirë për të formimin e një qeverie më vete. Ajo propozoi formimin e një qeverie të unitetit kombëtar.
ANC arriti një marrëveshje për të formuar një qeveri të unitetit kombëtar me Aleancën Demokratike, Aleancën Patriotike, Partinë e Lirisë Inkatha dhe Partinë e Mirë, ndër të tjera.
