Ministri i Punëve të Jashtme, Ivica Daçiq, është shprehur se të gjitha sulmet ndaj presidentit serb Aleksandër Vuçiq vetëm e dëmtojnë vendin e tyre.
Daçiq bëri thirrje që në Serbi të kishte përgjegjësi dhe unitet të plotë.
“Vuçiqi, si gjithmonë tregoi gjithë madhështinë dhe forcën e tij, duke shprehur synimet që Serbia të mbetet e përkushtuar në dialog, në mënyrë që të mos paragjykohet dhe sulmohet për refuzimin e pjesëmarrjes në kërkimin e zgjidhjes politike të krizës së Kosovës, duke treguar në të njëjtën kohë vendosmëri për të mbrojtur interesat tona kombëtare dhe shtetërore”, tha Daçiq për Tanjugun.
Sipas tij, sulmet ndaj Vuçiqit e dëmtojnë shtetin dhe se është veçanërisht hipokrite kur sulmet vijnë nga parti të opozitës që kishin rol shumë negativ në kohën sa ishin në pushtet, gjë që sipas tij çuan në shpalljen e pavarësisë së Kosovës.
Ai u shpreh se këto ishin ditë kur po merreshin vendime për interesat jetike të shtetit dhe popullit.
