Një gjeneral i lartë ushtarak i Danimarkës ka shprehur dyshime serioze mbi aftësinë e vendit për të përmbushur objektivat e saj të NATO-s, duke theksuar se do të duhen vite që vendi të ketë një ushtri të gatshme luftarake, transmeton Kosova Post.
Duke folur për transmetuesin lokal ‘TV 2’, gjenerali Henrik Lyhne tha se Ushtria daneze ka armatimin më të avancuar në botë, por po përballet me mungesën e ushtarëve.
“Kjo është një thirrje urgjente. Situata është jashtëzakonisht kritike, veçanërisht sepse na mungojnë ushtarët si kurrë më parë. Unë kam qenë në forcat e armatosura për 40 vjet dhe kurrë nuk është dukur kaq keq”, tha Lyhne.
Aktualisht, shtoi ai, 20 deri në 25 për qind e pozitave në ushtri janë të lira. Sipas tij, edhe “nëse më shumë para investohen së shpejti, do të duhen vite për të rivendosur një ushtri të aftë për luftim”.
Sipas transmetuesit ‘TV 2’, Danimarka po përmbush vetëm tre nga 17 “objektivat e forcës së armatosur” të përcaktuara nga Ministria e Mbrojtjes.
Duke iu përgjigjur komenteve të gjeneralit danez, ministri në detyrë i Mbrojtjes, Troelst Lund Poulsen, pranoi se situata është “kritike”.
“Kjo është edhe arsyeja pse disa ditë më parë pata takimet e para nga një seri e gjatë me organizatat ushtarake për të diskutuar se çfarë mund të bëjmë, si në afat të shkurtër këtë vit në 2023, ashtu edhe në lidhje me atë si duhet të duket një marrëveshje e re e mbrojtjes”, tha Poulsen./aa
