Presidentja e Kosovës, Vjosa Osmani, bashkë me kryeministrin në detyrë, Albin Kurti, kanë vizituar nga afër ushtarët e FSK-së dhe ata amerikanë dhe të kombeve të tjera të cilët po marrin pjesë në ushtrimin e quajtur “Defender Europe 25”.
Osmani ka theksuar se ky bashkëpunim tregon se Kosova jo vetëm që është e gatshme të kontribuojë në operacione të tilla, por njëkohësisht është e gatshme që të jetë shtet dhe anëtar i NATO-s.
“Jemi të gatshëm jo vetëm të kontribuojmë në operacione të tilla, por njëkohësisht të jemi shtet i barabartë dhe shtet anëtarë i NATO-s. Dua t’i falënderoj gjeneralët e SHBA-së që janë jo vetëm sot, por që janë një kohë të gjatë me ushtarët tanë në trajnime e përgatitje”, ka deklaruar ajo.
“Kemi arritur që të tregojmë, të demostrojmë fuqinë tonë, ndërveprueshmërinë që e kemi me NATO-n dhe në këtë mënyrë ta forcojmë kauzën tonë që anëtarësimi i Kosovës në NATO nuk është vetëm për dobinë tonë, por edhe për kontributin e tyre. Në ‘Defender Europe 2025’, kanë marrë pjesë gjithsej 25 shtete. 4 mijë e 500 hektarë tokë i kemi shpronësuar dhe tash Ministria e Mbrojtjes është pronare këtu në Babaj të Bokës në mënyrë që të tregoj edhe përkushtimin tonë për trajnimet e vijueshme me të cilët do t’i ngrisim aftësitë dhe kapacitetet e FSK-së”, ka thënë Kurti.
Ndryshe, sot në prani të udhëheqësve më të lartë shtetëror, përfaqësuesve diplomatik dhe udhëheqës të lartë ushtarak ndërkombëtarë, Forca e Sigurisë së Kosovës realizoi Ditën e Vizitorëve të Shquar të ushtrimit fushor shumëkombësh “Defender Europe 25” (DE/IR25).
