Deputetët e Kuvendit të Kosovës do të mblidhen sërish sot në ora 10:00 në tentativën e dhjetë me radhë për konstituim.
Pas betimit të deputetëve të Kuvendit të Kosovës, procesi ka ngelur në zgjedhjen e kryeparlamentarit, ku sot për herë të shtatë tentohet që kandidatja e Lëvizjes Vetëvendosje, Albulena Haxhiu të zgjidhet në krye të Kuvendit.
Derisa LVV si kandidate të vetme për kryeparlamentare ka prezantuar deri tani Albulena Haxhiun, e njëjta nuk e ka përkrahjen edhe të partive tjera, PDK-së, LDK-së e AAK-së.
E të premten, deputeti i Lëvizjes Vetëvendosje dhe ministri në dorëheqje, Hekuran Murati, ka apeluar që të shtunën të votohet zgjedhja e kryeparlamentarit dhe nënkryetarëve të Kuvendit të Kosovës, duke thënë se çfarëdo zvarritje a bllokade e mëtutjeshme e partive tjera duke votuar kundër konstituimit të Kuvendit, tashmë është e tepruar dhe e panevojshme.
Murati, përmes një postimi në Facebok, ka thënë se për dallim prej qeverisë, ku vetëm koalicioni qeverisës i merr të gjitha pozitat në ekzekutiv, në Kuvend pushteti ndahet tek të gjitha partitë.
“Pra, nuk i merr të gjitha pozitat e kryesisë koalicioni qeverisës që bën 61 vota, por pozitat e kryesisë ndahen tek të gjitha partitë. Në njëfarë forme, hartuesit e Kushtetutës kanë dashur të balancojnë pushtetin legjislativ duke imponuar, nëse mund të quhet kështu, një Koalicion Konstituiv para se të kalohet tek Koalicioni Qeverisës”, ka shkruar ai, transmeton Telegrafi.Murati tutje ka thënë se “Kryetari dhe një nënkryetar i takojnë partisë më të madhe, një nënkryetar i takon partisë së dytë, një nënkryetar i takon partisë së tretë, dhe dy nënkryetarë u takojnë partive që përfaqësojnë komunitetet jo-shumicë. Prandaj nuk ka kuptim që edhe më tutje të stërzgjatet diçka që është e përcaktuar në Kushtetutë”.
Sipas tij, marrë parasysh situatën në të cilën gjenden, mënyra e votimit të fshehtë, e sugjeruar edhe nga Gjykata Kushtetuese siç tha ai, ofron mundësinë ideale për të dalë nga bllokada dhe deputetët e zgjedhur të mund të çojnë në vend pushtetin e deleguar nga qytetarët, duke konstituuar Kuvendin e duke zgjedhur qeverinë e re.
