Deputeti i Lëvizjes Vetëvendosje në Kuvendin e Maqedonisë së Veriut, Bekim Qoku, ka reaguar duke iu përgjigjur ish-Ministrit të Jashtëm në MV, Bujar Osmanit, pasi ky i fundit akuzoi Kryeministrin e Kosoves, Albin Kurtin, rreth çështjes së Gjuhës Shqipe në MV, gjuhë që nuk njihet me kushtetutë, por që përfshihet në mënyrë jo të drejtpërdrejtë në atë që quhet ligji i 20 përqindëshit, përcjell Kosova Post.
Ja postimi i tij i plotë:
Bujar Osmani mbajti gjallë dhe promovoi fuqishëm projektin serbomadh Ballkani i Hapur.
Favorizoi Serbinë me propozimin 9-pikësh si kryesues i OSBE-së.
Vizitoi dy herë Ukrainën dhe kurrë Kosovën që u sulmua nga bandat dhe terroristët e Radojçiqit.
Nuk mbajti asnjë qëndrim zyrtar, as si ministër i jashtëm as si kryesues i OSBE-së për sulmin terrorist në Banjskë të Kosovës të orkestruar dhe organizuar nga shteti Serb.
Ja disa qëndrime politike dhe zyrtare të ish ministrit (shqiptar) për punë të jashtme të MV:
“Identiteti, gjuha maqedonase janë vijat e kuqe, si për maqedonasit, ashtu edhe për ne (shqiptarët). Këto janë vijat e kuqe dhe askush nuk ka të drejtë të negociojë për këtë.”
“Kundrejt Kosovës kam mbajtur qëndrim si ndërkombëtar dhe jo si shqiptar”.
“Ashtu siç Maqedonia mbante qëndrim të gabuar ndaj Greqisë, ashtu edhe Kosova sot po mban qëndrim të gabuar ndaj Serbisë”
“Për hir të disa interesave globale me rëndësi, ne do na duhet të heqim dorë nga çështjet kombëtare”
