Sulmuesi nigerian, Victor Osimhen, aktualisht i huazuar nga Napoli te Galatasaray, është rikthyer në qendër të vëmendjes, teksa diskutimet për të ardhmen e tij po intensifikohen.
Pas një largimi të dështuar përfundimisht nga Napoli verën e kaluar për shkak të marrëdhënieve të tensionuara me drejtuesit e klubit italian, një shitje e mundshme sërish është në tavolinë, me një përjashtim të vetëm.
Galatasaray do të dëshironte ta mbante 26-vjeçarin në skuadër pas një sezoni mbresëlënës në Superligën turke: 25 ndeshje, 21 gola dhe 4 asistime në 1881 minuta lojë.
Por problemi qëndron te klauzola e largimit prej 75 milionë eurosh, një shifër që tejkalon mundësitë financiare të klubit turk.
Pretendentët nga Anglia dhe Italia
Me Galatasaray-n që e ka të vështirë të përballojë shifrën e kërkuar, klube të mëdha si Arsenal, Chelsea, Manchester United dhe Juventus janë përmendur si të interesuara. Por presidenti i Napolit, Aurelio De Laurentiis, ka bërë të qartë një gjë në intervistën për radion italiane ‘Kiss Kiss Napoli’:
“Për Juventusin, kurrë!” – deklaroi prerë De Laurentiis, duke përjashtuar çdo transferim te rivalët historikë të Napolit, pavarësisht se Juventusi konsiderohet një nga kandidatët kryesorë për firmën e Osimhen.
A do të qëndrojë në Turqi?
Sipas medieve turke, Galatasaray ende nuk ka hequr dorë dhe po shqyrton mënyra kreative për të financuar transferimin, megjithëse kjo do të kërkonte që vetë Osimhen të hiqte dorë nga ëndrra për Premier League. Nënkryetari i klubit, Abdullahi Kavoukcu, ka deklaruar se vendimi përfundimtar pritet të merret brenda këtij muaji.
Ndërkohë, e ardhmja e njërit prej sulmuesve më të kërkuar në Europë mbetet ende pezull me shumë interesa, por edhe shumë pengesa për t’u kapërcyer.s.n.
