Ambasada e Turqisë në Prishtinë dhe Oda Tregtare Kosovaro-Turke (KTTO) organizuan një program iftari në kryeqytetin e Kosovës, Prishtinë, raporton Anadolu, transmeton KosovaPost.
Në programin e iftarit të mbajtur në një hotel në Prishtinë morën pjesë Kryetarja e Kuvendit të Kosovës, Albulena Haxhiu, Ambasadori i Turqisë në Prishtinë, Sabri Tunc Angili, Zëvendëskryeministri i tretë i Kosovës për Çështje të Pakicave dhe Bashkëpunim, Fikrim Damka, Kryetari i Bashkësisë Islame të Kosovës, Naim Tërnava, Kryetari i KTTO-së, Orcun Ozdemir, Komandanti i Forcës Paqeruajtëse të NATO-s në Kosovë (KFOR), Gjeneralmajor Ozkan Ulutas, si dhe ministra, kryetarë dhe përfaqësues të partive politike, deputetë dhe shumë të ftuar të tjerë.
Kryetarja e Kuvendit, Haxhiu, në fjalën e saj theksoi se marrëdhëniet mes Kosovës dhe Turqisë janë të ndërtuara mbi respektin e ndërsjellë, solidaritetin dhe mbështetjen e vazhdueshme.
Haxhiu tha se bashkëpunimi mes dy vendeve është i gjerë dhe konkret.
“Turqia ka qenë ndër vendet e para që e njohu pavarësinë e Republikës së Kosovës një ditë pas shpalljes së saj dhe vazhdon të jetë një partner i rëndësishëm në ndërtimin e shtetit dhe në rrugëtimin tonë ndërkombëtar”, tha Haxhiu.
Ambasadori Angili uroi që viti 2026 të jetë një vit i stabilitetit politik, rritjes ekonomike dhe forcimit të dialogut ndërmjet të gjithë aktorëve politikë në Kosovë.
“Besoj se institucionet e forta me një ekonomi dinamike dhe një demokraci funksionale do të jenë pasuria më e çmuar jo vetëm për Kosovën, por për të gjithë rajonin”, tha ai.
Ndërsa Kryetari i KTTO-së, Ozdemir, theksoi se që nga themelimi i odës në vitin 2008, ajo ka vazhduar të punojë për zhvillimin e Kosovës dhe zgjerimin e marrëdhënieve mes dy vendeve.
