Nëse ”Sky ecc1’ tronditi kupolën kriminale dhe lidhjet e tyre me politikën, ”Sky ecc2” është diçka më shumë, e që pritet të jetë edhe pika që derdh gotën…
Prej disa ditësh po diskutohet në sallonet e politikës së Tiranës për mbërritjen në prokurorinë Speciale të episodit të dytë të bisedave ’SKY’ nga partnerët francezë.
Edhe pse është një proces i gjatë për t’i zbardhur dhe redaktuar, duket se diçka ka rënë në vesh të grupeve të interesuara, ndaj ka nisur një lobim për të marrë vesh sa më shumë.
Telefoni i Taulant Ballës ka qenë më i tringëlluari këto ditë, për të kuptuar sa më shumë nga ajo që ka dalë ose është nxjerrë prej pjesës së dytë.
Thelbi i gjithë këtij makthi është fakti që kanë dalë zërat, ku në biseda me kapo të krimit, në rrjetin e kriptuar janë politikanë shumë shumë të rëndësishëm.
Ende nuk dihet nëse ky është një realitet i zbuluar qartë, apo janë zëra të dalë për të shantazhuar, siç ndodh rëndom tani më, kryesisht nga brenda llojit.
Ndërkaq, zëra brenda mazhorancës, thonë se edhe shtyrja e kongresit të PS-së për një javë, ka ndodhur në mënyrë të beftë, pikërisht nga frika e daljes në skenë të transkriptimeve nga ’SKY 2’ një ditë apo dy ditë përpara, ose siç ndodh shpesh kohët e fundit, të shtunën. E kështu e kanë shtyrë për të dielën e ardhshme, për ti dhënë kohë informacionit.
Ardhja e materialeve të përgjimit të bisedave në kanalet e kriptuara është realizuar përmes rrugëve ngushtësisht gjyqësore, ku thuajse ka pak ose aspak rol zinxhiri politik i ministrisë së Brendshme. Edhe oficerët ndërlidhës të policisë që punojnë në Europol dhe Interpol, përcjellin vetëm shkresat që i kuadrojnë në bazë të marrëveshjeve të ndërsjellta.
Ndërkohë përmbajtja e materialeve përcillet e dorëzohet nga prokurorët e vendeve ku është zbuluar ose kapur ky ”gjah” i madh kriminal. Në këtë rast Franca, ku oficerët gjyqësore të xhandërmarisë kanë arritur të zbërthejnë rrjetet e kriptuara falë teknologjisë së lartë që kanë dhe e përdorin. Ky ‘know- how’ është jo shumë i shpeshtë në Europë.
Kështu për shembull, policia gjyqësore italiane që është një nga më të mirat në botë, si DIA apo Guardia di Finanza, aktualisht nuk kanë mjetet e aftësitë për të zbërthyer kanalet e kriptuara të komunikimit. Në Europë, këto i bëjnë vetëm policia gjermane, ajo franceze dhe holandezët.
Ndërkaq, duke ardhur tek ne, zbërthimi i pjesës së parë të ’SKY’ tronditi kupolën kriminale dhe lidhjet e tyre, duke arrestuar dhe vënë në kërkim, një pjesë të mirë të kurorës kriminale që ka mbështetur Edi Ramën në këto 12 vjet. Duket se ’SKY 2’ është diçka më shumë, e që pritet të jetë edhe pika që do të derdhë gotën. Por nuk është vetëm Rama e deputetët e mazhorancës që janë shqetësuar, pasi janë shumë edhe nga opozita të tronditur. Kjo u pa edhe në sjelljen e fundit ndaj Altin Dumanit në Kuvend, por edhe në sjelljen e çuditshme të Ilir Metës, që e përmend ’SKY’-in shpesh, duke shantazhuar gazetarë e politikanë./Pamfleti
