Autoritetet në Serbi kanë arrestuar katër shtetas të Shqipërisë nën dyshimin për “nxitje të urrejtjes” dhe “intolerancës kombëtare”, pas publikimit të një videoje në rrjete sociale gjatë udhëtimit të tyre në autostradë në territorin serb.
Ministria e Punëve të Brendshme e Serbisë ka njoftuar se katër shtetas të Shqipërisë janë arrestuar nën dyshimin për “nxitje të urrejtjes” dhe “intolerancës kombëtare”, pas publikimit të një videoje në rrjete sociale gjatë udhëtimit të tyre në autostradë në territorin e Serbisë.
Sipas komunikatës zyrtare të MPB-së serbe, personat e moshës 21 deri në 48 vjeç dyshohet se gjatë ngasjes së automjetit kanë shfaqur simbole të lidhura me Shqipërinë dhe kanë bërë deklarata që autoritetet i kanë cilësuar si të papërshtatshme ndaj Republikës së Serbisë.
Sipas njoftimit, policia sebe ka arrestuar A. S. (1989), E. V. (1984), E. G. (1978) dhe A. C. (2005), shtetas të Republikës së Shqipërisë, në territorin e Republikës së Serbisë, për shkak të ekzistencës së bazave të dyshimit se ata kanë kryer veprën penale të nxitjes së urrejtjes dhe intolerancës kombëtare, racore dhe fetare.
“Dyshohet se A. S. sot, në ditën që shënon fillimin e agresionit të NATO-s, ka postuar publikisht një video në llogarinë e tij në Facebook, ku shihet në një makinë Audi në shoqërinë e të dyshuarve të tjerë, duke drejtuar në një autostradë përmes Serbisë, duke treguar në mënyrë të papërshtatshme simbolet e “Shqipërisë së Madhe”, si dhe duke përmendur verbalisht Republikën e Serbisë në një kontekst negativ, duke përdorur fjalë të papërshtatshme”, tha Ministria e Brendshme në një deklaratë.
Të dyshuarit janë ndaluar për 48 orë dhe ndaj tyre pritet të ndërmerren veprime të mëtejshme ligjore, sipas procedurave në fuqi në Serbi.
Rasti është bërë publik nga MPB e Serbisë, ndërsa deri më tani nuk ka reagime zyrtare nga pala shqiptare lidhur me arrestimin./rtk
