Familjet e pengjeve izraelite deklaruan të shtunën se nuk do ta lejonin kryeministrin izraelit Benjamin Netanyahu ta “prishë marrëveshjen me Hamasin ose t’i kthejë tunelet e Gazës në varre” për pengjet izraelite.
Në një deklaratë, ata bënë thirrje për demonstrata përpara Ministrisë së Mbrojtjes izraelite në Tel Aviv.
“Në vendin ku Netanyahu kërcënon të nisë një luftë të re, duke i shkelur marrëveshjet dhe duke i sakrifikuar pengjet, ne do të vazhdojmë të dërgojmë një mesazh të qartë sonte: Nuk do t’ju lejojmë t’i ktheni tunelet e Gazës në varre për fëmijët tanë,” thanë ata.
Familjet theksuan “kërkesën për kthimin e pengjeve menjëherë”.
Izraeli vlerëson se 59 pengje mbahen ende në Gaza, me të paktën 22 prej tyre të gjallë.
Të premten, një deklaratë nga zyra e të dërguarit presidencial të ShBA-së për Lindjen e Mesme, Steve Witkoff, dhe Këshillit të Sigurisë Kombëtare, të publikuar nga Shtëpia e Bardhë, deklaroi se “Presidenti (Donald) Trump e ka bërë të qartë se Hamasi ose do t’i lirojë pengjet menjëherë, ose do të paguajë një çmim të rëndë”.
Të mërkurën në mbrëmje në Doha, Katar, Witkoff dhe Drejtori i Lartë i Këshillit të Sigurisë Kombëtare për Lindjen e Mesme dhe Afrikën e Veriut, Eric Trager, paraqitën një propozim “urë” që do të “lejojë kohë për të negociuar një kornizë për një armëpushim të përhershëm”, tha ajo.
Të enjten, Hamasi njoftoi rifillimin e negociatave me ndërmjetësit në Doha në lidhje me një marrëveshje armëpushimi në Rripin e Gazës.
Grupi palestinez tha të premten se miratoi propozimin e ndërmjetësuesve për t’i rifilluar negociatat.
Nga ana tjetër, kryeministri izraelit Benjamin Netanyahu vonoi përgjigjen e tij ndaj pranimit të propozimit të ndërmjetësve nga Hamas dhe u përpoq të kthente fajin mbi lëvizjen, duke pretenduar se ajo “vazhdon të përfshihet në manipulime dhe luftë psikologjike”.
Faza fillestare 42-ditore e një marrëveshjeje prej tri fazash të armëpushimit përfundoi në fillim të marsit, por Izraeli ka rezistuar të avancojë në fazën e dytë, duke favorizuar zgjatjet për të siguruar lirim shtesë të pengjeve pa përmbushur detyrimet ushtarake ose humanitare.
Hamasi këmbëngul në zbatimin e marrëveshjes së plotë dhe u bëri presion ndërmjetësve që t’i nisin menjëherë bisedimet për fazën e dytë të marrëveshjes, shkruan trtbalkan.albanian.Marrëveshja e armëpushimit dhe shkëmbimit të të burgosurve, e cila u zbatua në janar, ka ndalur luftën gjenocidale të Izraelit në Gaza, e cila ka vrarë më shumë se 48.500 viktima, kryesisht gra dhe fëmijë, si dhe e ka lënë enklavën në gërmadha.
