Kryeministri i Republikës së Kosovës, Albin Kurti, me rastin e muajit të shenjtë të Ramazanit, ka shtruar iftar për Myftiun e Kosovës, Naim ef. Tërnava, dhe bashkëpunëtorët e tij, përcjell Kosova Post.
Kryeministri Kurti shprehu respekt për devotshmërinë dhe vetëpërmbajtjen e agjëruesve gjatë Ramazanit, duke uruar që sakrifica e tyre të shpërblehet dhe që solidariteti e ndjeshmëria të forcojnë edhe më shumë besimin dhe mirëkuptimin ndërmjet njerëzve.
Ai falënderoi Myftiun Tërnava dhe Bashkësinë Islame të Kosovës për angazhimin dhe kontributin e tyre në shoqëri dhe për vendin.
Nga ana tjetër, Kryetari i Bashkësisë Islame të Kosovës, Myftiu Naim ef. Tërnava, e uroi kryeministrin Kurti për mandatin e ri, duke i dëshiruar suksese dhe punë të mbarë në drejtimin e vendit.
Gjatë takimit u diskutua edhe për vazhdimin dhe thellimin e bashkëpunimit ndërmjet Qeverisë së Kosovës dhe Bashkësisë Islame të Kosovës./KosovaPost/
