Mbrëmë në qytetin e Mitrovicës është hapur festivali i artit Green Fest, ndërsa kryetar i Komunës së Mitrovicës, Bedri Hamza, ka vlerësuar se Mitrovica nuk është vetëm minierë e arit.
Hamza shkruan në Facebook se ky qytet është edhe minierë e kulturës, emancipimit, muzikës dhe bashkëjetesës ndëretnike.
“Si freski kulturore në këto ditë të nxehta, mbrëmë në Mitrovicë nisi Green Fest. Mitrovica nuk është vetëm minierë e arit, por edhe e kulturës, emancipimit, muzikës dhe bashkëjetesës ndëretnike. Thesari ynë më i madh janë njerëzit, të cilët krijuan traditë dhe vlera të artit bashkëkohor. Arti përbën edhe një segment të rëndësishëm në planin tim për zhvillimin e industrive kreative, që ndikojnë në zhvillimin ekonomik dhe punësimin e të rinjve. Në Green Fest do të performojnë artistë të shumtë katër ditë me radhë. Jam krenar për përkrahjen e këtij festivali, por edhe një numri rekord të ngjarjeve kulturore. Ejani dhe shijoni mikpritjen mitrovicase!”, ka shkruar Hamza.
