Përzgjedhësi i Kombëtares së Kosovës, Franco Foda, të hënën në një konferencën për media, ka folur për dy ndeshjet e ‘play-off-it në Ligën e Kombeve.
Dardanët do të ndeshen me Islandën më 20 mars në ‘Fadil Vokrri’, kurse, tri ditë më vonë luhet ndeshjes kthyese në Murcia të Spanjës.
Strategu gjerman i Kombëtares sonë, mendon se skuadra e tij, do të jetë gati më kohë për duelin e parë kundër islandezëve, edhe pse sipas tij, skuadra e tij do të jetë e hendikepuar pa Edon Zhegrovën dhe Fisnik Asllanin të lënduar. Megjithatë, Foda kërkon fitore në duel me Islandën.
“Kemi disa mungesa si Edon Zhegrova dhe Fisnik Asllanin, tani duhet të gjejmë zgjidhje të reja. E dimë se Islanda është skuadër e fortë, luan lojë ofensive dhe janë agresive. Ne do të japim më të mirën si kundër Rumanisë dhe shpresojë shumë së do të fitojmë”, ka thënë Foda.
Ai ka folur edhe për Etink Bruttin, i cili tashmë i është bashkuar kombëtares së Shqipërisë.
“Atë e kam parë në shumë lojëra të tij të Malisheva. Kam biseduar me Brutti, është lojtar me perspektive, ka qenë kapiten i U21. Për ne me rëndësi është që të kemi lojtarë që duan të luajnë për Kosovën, që duan të luajnë me zemër për Kosovën. Por, Brruti tash ka vendosur të luajë për Shqipërinë dhe i urojmë suksese. Ai nuk ka pasur ftese për ndeshjet e marsit, por në të ardhmen ka qenë opsion real”, ka theksuar Foda.
Tekniku gjerman ka folur edhe për mosftesën e Meriton Korenicës, i cili po kalon formë mjaft të mirë në Rumani.
“Ai po kalon formë të mirë, por fatkeqësisht nuk mund t’i fitojë gjithë lojtarët. Këta 25 lojtarë që i kemi ftuar na kanë bindur, por në qershor kemi ndeshjet miqësore dhe mund të ftohet”, ka pohuar Foda.
Foda është pyetur edhe rreth lëndimit të kapitenit Amir Rrahmani.
“Po mbrëmë kam telefonuar me Rrahmanin. Ai ka problemet e veta muskulare, por ai do të vijë në kamp dhe do të shohim se si do të jetë gjendja e tij”, ka deklaruar Foda.
Kosova sot në orën 17:30, në Kampin Nacional në Hajvali do të mbajë stërvitjen e parë para ndeshjes me Islandën.rtk.
