Po afrohet fundi i aventurës së Carlo Ancelotti-t në stolin e Real Madridit. Brenda katër ditësh, “Los Blancos” do të përballen me Barcelonën në finalen e Copa del Rey në Sevilje — një mundësi e artë për t’u hakmarrë ndaj humbjeve të rënda që kanë pësuar këtë sezon nga katalanasit dhe për t’i dhënë fund një epoke me një trofe në dorë.
Zërat për largimin e italianit janë gjithnjë e më të fortë, pavarësisht se kontrata e tij zgjat deri në vitin 2026 dhe në horizont është edhe pjesëmarrja në Botërorin e Klubeve — një kompeticion që Ancelotti nuk e ka pëlqyer asnjëherë. Madje qershorin e kaluar ai deklaroi se Madridi nuk do të merrte pjesë, gjë që solli një reagim zyrtar nga klubi për të mohuar këtë qëndrim, duke e detyruar trajnerin të tërhiqej.
Ky sezon duket se ka vulosur përfundimin e një cikli. Edhe një mjeshtër i menaxhimit të dhomës së zhveshjes si Ancelotti ka vuajtur për të mbajtur ekuilibrin në një skuadër me shumë ‘yje’, por pa shumë qëndrueshmëri. Politikat e merkatos kanë qenë të pasakta, të fokusuara më shumë në emra të mëdhenj si Mbappé sesa në nevojat reale të ekipit. Kroos nuk është zëvendësuar, ndërsa Modric është drejt të dyzetave.
Rezultatet flasin vetë: humbje 0-4 në “Bernabéu” ndaj Barcelonës dhe 2-5 në Superkupë ndaj së njëjtës skuadër. Real Madridi u eliminua në çerekfinalet e Ligës së Kampionëve për herë të parë që nga viti 2020.
Ndërkohë, zëvendësuesi duket se është gati: Xabi Alonso. Ish-mesfushori spanjoll, aktualisht trajner i Bayer Leverkusen-it, shihet si favorit absolut për ta pasuar Ancelotti-n. Edhe pse është në listën e dëshirave të Liverpool-it dhe Bayern-it, marrëveshja e tij me Leverkuseni-n për një “pakt zotërinjsh” ia lehtëson rrugën për te Real Madridi. Sipas CEO-s së klubit gjerman, Fernando Carro, nuk ka asnjë klauzolë zyrtare — por një marrëveshje verbale: nëse thirret nga një prej klubeve ku ka luajtur, ai mund të largohet lirshëm.
Pas një sezoni historik, ku e shpalli Leverkusenin kampion të Gjermanisë për herë të parë dhe pa asnjë humbje, Alonso duket gati për hapin e madh. Marrëdhëniet mes dy klubeve janë të shkëlqyera dhe gjithçka duket e gatshme për një epokë të re në “Bernabéu”.s.net.
