Superliga shqiptare, me rregullat e reja të FSHF-së, do të lejojë deri në 7 lojtarë të huaj njëkohësisht deri në fund të këtij sezoni. Ndërsa nga sezoni 2025-2026 kufizimi do të hiqet plotësisht, duke hapur mundësinë që formacionet të jenë plotësisht të huaja. Ky vendim ka ngritur shqetësime për të ardhmen e futbollit vendas, duke rrezikuar zhvillimin e talenteve shqiptare dhe rolin e akademive.
Superliga shqiptare rikthehet të luhet më 11 janar, por kjo pjesë e sezonit do të zhvillohet me rregulla të reja.
Klubet e Kategorisë Superiore dhe Kategorisë së Parë do të lejohen të aktivizojnë deri në 7 lojtarë të huaj njëkohësisht në fushë gjatë ndeshjeve. Në të kaluarën, klubet e Kategorisë Superiore në Shqipëri lejoheshin të aktivizonin njëkohësisht deri në 5 lojtarë të huaj gjatë ndeshjeve.
Skuadra e Seria A hidhet në sulm për Arbër Hoxhën
Ky kufizim synonte të inkurajonte zhvillimin e talenteve vendase dhe të siguronte një ekuilibër midis lojtarëve vendas dhe atyre të huaj në fushë.
Rregullat e reja të vendosura nga Federata Shqiptare e Futbollit, kanë nxitur debate të shumta në komunitetin sportiv.
Megjithatë, ky rregull do të ndryshojë edhe më tej për sezonin 2025-2026. Sipas vendimit, klubet e Kategorisë Superiore do të kenë lirinë të aktivizojnë lojtarë të huaj pa asnjë kufizim.
Praktikisht, kjo do të thotë se një skuadër mund të ketë 11 futbollistë të huaj në formacionin e saj bazë, duke i lënë mënjanë lojtarët vendas. Për Kategorinë e Parë, rregulli mbetet i pandryshuar me maksimumin e 7 lojtarëve të huaj në fushë.
Ndërsa për Kategorinë e Dytë, një tjetër ndryshim është bërë: kufizimi për numrin e lojtarëve që vijnë nga jashtë qarkut është hequr. Kjo hap derën për një rritje të numrit të lojtarëve jo vendas edhe në nivelet më të ulëta të futbollit.
Deri tani, kufizimi i lojtarëve të huaj ka shërbyer si një mekanizëm për të nxitur prodhimin dhe promovimin e talenteve vendase. Me këtë vendim të ri, shqetësimet janë të shumta.
A do të rritet cilësia e kampionatit dhe do të tërhiqen më shumë tifozë në stadiume? Apo, përkundrazi, ky hap do të dëmtojë rëndë akademitë shqiptare dhe do të pengojë zhvillimin e brezit të ardhshëm të yjeve të futbollit shqiptar?
Ndikimet e këtij vendimi do të jenë të dukshme që në merkaton e janarit, ku klubet pritet të zhvendosin fokusin e tyre drejt tregut të huaj. Por mbetet për t’u parë nëse ky ndryshim do të rezultojë një hap përpara apo një kthim pas për futbollin shqiptar.
