Avokati Tomë Gashi ka komentuar situatën aktuale politike në vend, duke pranuar publikisht se jo gjithmonë parashikimet e tij dalin të sakta.
Gashi u shpreh se një prej rasteve të fundit ku nuk e kishte parashikuar mirë situatën ishte rreth dy javë më parë, kur pritej që Albulena Haxhiu të zgjidhej kryetare e Kuvendit të Kosovës përmes një votimi të fshehtë.
“Kishte premtime jo shumë publike, por dihej që do të bëhej vota për këtë komision për votim të fshehtë dhe do të zgjidhej Albulena Haxhiu përfundimisht si kryetare e Parlamentit të Kosovës, pastaj do të zgjidheshin edhe pesë nënkryetarët, duke e zgjidhur kështu një bllokadë që për mua është krejtësisht false dhe e panevojshme”, tha avokati Gashi në RTV Dukagjini.
Ai shtoi se kjo bllokadë parlamentare është e panevojshme dhe se partitë politike po e përdorin atë për të testuar kryeministrin Albin Kurti.
“Nëse partitë opozitare mendojnë se Albin Kurti nuk i ka votat për Qeverinë Kurti 3, atëherë duhet ta tejkalojnë këtë ngërç artificial dhe t’ia japin Kurtit mundësinë ligjore prej 15 ditësh, duke përfshirë edhe vikendet, që të dalë publikisht me 61 deputetë për formimin e qeverisë së re”, theksoi Gashi.
