Sulmet izraelite në të gjithë Rripin e Gazës kanë vrarë të paktën 30 palestinezë që nga mbrëmja e së hënës, thanë mediat palestineze, ndërsa ushtria izraelite forcoi rrethimin e saj në zonat veriore të enklavës.
Një sulm ajror dëmtoi dy shtëpi në qytetin Beit Lahiya në Gazën veriore, ku ushtria ka kryer operacione të reja që nga 5 tetori dhe vrau të paktën 20 persona, tha agjencia zyrtare palestineze e lajmeve WAFA dhe media e Hamasit.
Ministria e Shëndetësisë në Gaza nuk e konfirmoi numrin e saktë të të vdekurve. Katër persona të tjerë u vranë në qytetin qendror të Gazës, Al-Zawayda rreth mesnatës të së hënës, thanë mjekët.
Zyrtarët palestinezë shëndetësorë thanë se gjashtë persona ishin vrarë gjithashtu në dy sulme ajrore të veçanta izraelite në qytetin e Gazës dhe Deir Al-Balah, në zonën qendrore të enklavës së ngushtë. Ushtria izraelite tha, pa dhënë detaje, se forcat e saj kishin “eliminuar terroristët” në Rripin qendror të Gazës dhe zonën e Jabalia. Trupat izraelite kishin gjetur gjithashtu armë dhe eksplozivë gjatë ditës së kaluar në zonën jugore të Rafahut, ku “vendet e infrastrukturës terroriste” ishin eliminuar, tha ai.
Palestinezët thanë se sulmet e reja dhe urdhrat e Izraelit për evakuimin e njerëzve kishin për qëllim zbrazjen e dy qyteteve veriore të Gazës dhe një kamp refugjatësh për të krijuar zona tampon.
Ndërkohë, Irani ka kërcënuar përsëri Izraelin me luftë.
“Ne nuk e njohim ekzistencën e regjimit sionist si një element pushtues dhe gjatë vizitave të mia të fundit rajonale kam thënë vazhdimisht, duke iu drejtuar Izraelit, “mos e testoni vullnetin tonë”. Izraeli ka tentuar shumë herë gjatë vitit të kaluar të provokojë Iranin në një konflikt, por ka dështuar çdo herë, pasi Teherani merr çfarëdo mase që i sheh të nevojshme në lidhje me veprimet izraelite”, tha ministri i Jashtëm iranian, Abbas Araghchi, i cili mbërriti në Islamabad për të zhvilluar bisedime me autoritetet pakistaneze, përfshirë kryeministrin Shahbaz Sharif, mbi zhvillimet dypalëshe dhe rajonale. (A2 Televizion)
