Donika Gërvalla, ministre në detyrë e Punëve të Jashtme, ka takuar homologun e saj turk, Hakan Fidan, përcjell KosovaPost.
Takimi ka ndodhur në margjinat e Platformës së Paqes për Ballkanin.
Gërvalla e ka cilësuar Turqinë si mike dhe aleate të ngushtë të Kosovës.
Postimi i plotë:
Turqia, si shtet mik dhe aleat i ngushtë i Republikës së Kosovës, mbetet një partner i rëndësishëm në promovimin e paqes, stabilitetit dhe bashkëpunimit rajonal. Me ftesë të Ministrit të Punëve të Jashtme të Republikës së Turqisë, z. Hakan Fidan, në Stamboll zhvilluam një takim bilateral në kuadër të takimit të dytë të Platformës së Paqes për Ballkanin.
Gjatë takimit me Ministrin Fidan theksova se Republika e Kosovës, përmes angazhimit të saj në këtë platformë, riafirmon orientimin strategjik drejt integrimit euroatlantik, përfshirë anëtarësimin në Bashkimin Evropian dhe NATO, si dhe përkushtimin ndaj paqes së qëndrueshme, fqinjësisë së mirë dhe stabilitetit rajonal. Po ashtu, vura në dukje rëndësinë e thellimit të bashkëpunimit në fushën e sigurisë dhe të përpjekjeve të përbashkëta për një rajon më të sigurt.
Falënderova Ministrin Fidan për ftesën dhe mikpritjen, duke ritheksuar marrëdhëniet e shkëlqyera dhe partneritetin e qëndrueshëm ndërmjet Republikës së Kosovës dhe Republikës së Turqisë, si dhe rolin e saj në avancimin e dialogut, paqes dhe stabilitetit në rajon dhe më gjerë.
