Drejtoresha e Inspekcionit të Komunës së Gjilanit, Entela Hyseni ka njoftuar se drejtoria në fjalë ka gjobitur një qytetar me 200 euro për hedhje mbeturinash. Sipas njoftimit, qytetari kishte hedhur mbeturina nga vetura në kontenierë, në lagjen Bojanina.
Sipas drejtoreshës Hyseni, kjo po bëhet me qëllim të parandalimit të keqpërdorimit të hedhjes së mbeturinave dhe krijimit të një mjedisi më të pastër.
“Pas ndërmarrjes së masave inspektuese, është identifikuar automjeti dhe pala, të cilit i është shqiptuar gjoba për hedhje mbeturinash”, tha Hyseni.
Hyseni ka theksuar se kohë më parë kanë lëshuar njoftim që ka të bëjë me ndalimin e hedhjes së mbeturinave në hapësirat e përbashkëta, korridore, shkallë, ashensorë e të ngjashme.
“Personat fizikë e juridikë që nuk e respektojnë këtë njoftim, do tê sanksionohen në harmoni me Rregulloren për Shërbime Publike Komunale”, ka deklaruar Entela Hyseni, drejtoresh e Inspekcionit.
