(Përditësuar, ora 09:47)- Këshilli Gjyqësor i Kosovës (KGJK) me propozim të kryetarit të Gjykatës Supreme, Fejzullah Rexhepi, ka caktuar gjyqtarin Shkelzen Syla ushtrues detyre i gjyqtarit mbikëqyrës të Dhomës së Posaçme të Gjykatës Supreme.
Syla u caktua në këtë pozitë në mbledhjen e 342-të të KGJK-së, të martën, raporton “Betimi për Drejtësi“.
Deri te emërimi i Sylës erdhi pasi që gjyqtari që ka qenë ushtrues detyre i gjyqtarit mbikqyrës në këtë gjykatë, Sahit Sylejmani, ka arritur moshën e pensionimit.
Syla u caktua ushtrues detyre me votat e të gjjthë anëtarëve të Këshillit.
Lirije Maksutaj zgjidhet gjyqtare në shkallën e parë të Dhomës së Posaçme të Gjykatës Supreme
(Përditësuar, ora 09:42)- Në mbledhjen e 342-të të Këshillit Gjyqësor të Kosovës (KGJK), të martën, gjyqtarja Lirije Maksutaj është zgjedhur si gjyqtare në Dhomën e Posaçme të Gjykatës Supreme- shkalla e parë.
Paraprakisht, anëtarja e Këshillit, Teuta Ibrahimi ka paraqitur raportin e panelit për përzgjedhjen e gjyqtarit në shkallën e parë të Dhomës së Posaçme të Gjykatës Supreme, duke propozuar Maksutajn në këtë pozitë.
Maksutaj u caktua në këtë detyrë me votat e të gjjthë anëtarëve të Këshillit.
Besnik Bislimaj dhe Mirjeta Shala fillojnë punën si anëtarë të Këshillit Gjyqësor të Kosovës
Prishtinë- Në mbledhjen e 342-të të Këshillit Gjyqësor të Kosovës, është bërë certifikimi i rezultatit zgjedhor për zgjedhjen e anëtarëve të Këshillit nga gjyqësori, me këtë rast filluan punë si anëtarë të KGJK-së, Besnik Bislimaj dhe Mirjeta Shala.
Paraprakisht, kryetarja e Komisionit për mbarëvajtjen e procesit zgjedhor, Drita Rexhaj paraqitur raportin deri në përzgjedhjen e anëtarëve Bislimaj dhe Shala, duke sqaruar se procesi ka qenë transparent dhe me integritet, raporton “Betimi për Drejtësi”.
Bislimaj më 21 janar 2025, u zgjodh anëtar i KGJK-së nga radhët e gjyqtarëve të Gjykatës së Apelit.
Ndërkaq, më 31 janar 2025, Shala ishte zgjedhur anëtare e KGJK-së nga radhët e Gjykatave Themelore dhe dhomat e shkallës së parë të Komerciales, e më 20 janar 2025, ishte konfirmuar paraprakisht si kandidate për anëtare të Këshillit.
Mandati i tyre është 5-vjeçar si anëtarë të Këshillit.
Deri të zgjedhja e Bislimajt dhe Shalës erdh pasi që gjyqtarit nga radhët e Gjykatës së Apelit, Qerim Ademaj dhe gjyqtarit nga Gjykata Themelore në Mitrovicë, Avni Mehmeti u përfundoi mandati si anëtarë të KGJK-së.
Instituti i Kosovës për Drejtësi ka monitoruar procesin e përzgjedhjes së anëtarëve të rinj të Këshillit Gjyqësor.
