Kandidatja për deputete nga Lëvizja Vetëvendosje, Adelina Grainca, ndjehet e nderuar të takonte hoxhë Adem Hoxhën, i cili tha ajo është një figurë e ndritur e arsimit dhe edukimit të brezave, i cili poashtu një jetë i’a ka kushtuar atdheut, mirësisë e dijes, përcjell Kosova Post.
Ndërsa flet me shumë dashuri për urtakun e dijes, Grainca thotë se janë të rrallë e të papërsëritshëm personalitetet e tilla si Adem ef. Hoxha.
“Janë të rrallë e vështirë të përsëritshëm personalitetet si hoxha i nderuar. Një jetë të tërë kushtuar mirësisë, librit, dijes dhe shërbimit ndaj atdheut, popullit e kombit. Me karrierë të filluar para më shumë se gjysmë shekulli, hoxha Adem, me përvojë të marrjes së dijes në Lindjen e Mesme e edhe në universitetin më të vjetër në botë, në Azhar të Egjiptit, u kthye për të dhënë kontribut në edukim dhe arsimim të brezave si dhe në mobilizim e vetëdijësim për çlirim nga okupatori”, shprehet Grainca.
Tutje, thekson ajo se Adem efe. Hoxha me urtësinë e tij ndriçoi mendjet e sa e sa brezave dhe me përkushtimin e tij ndërtoi ura bashkimi mes popullit tonë atëherë kur uniteti ishte nevoja më e madhe mbarëkombëtare.
“Hoxha Adem është lexues i jashtëzakonshëm i Kuranit që me zërin e tij të pastër nderoi vendin tonë në garat botërore si dhe është studiues i palodhur. Si i tillë, asnjëherë nuk e mbajti dijen për vete, por e shpërndau me bujari ndër breza, për dekada me radhë. Si imam e mësues, ai u bë dritë shprese për shumëkënd, duke i edukuar të rinjtë dhe duke i bërë të pajisur me dije, besim e me përgjegjësi”, tha Grainca
Ajo kujton gjithashtu se Adem efend. Hoxha, nuk ishte vetëm njeri i shpërndarjes së dijes dhe mirësisë, porse kontribut të madh ai dha edhe në çlirimin e vendit.
“Mirëpo, Adem efendiu nuk ishte vetëm njeri i fjalës, por edhe njeri i veprës. Në kohët më të vështira, kur shumëkush mund të ishte ndrojtur a tërhequr, ai qëndroi i palëkundur në rrugën për çlirim: ndihmoi me tërë qenien rezistencën kombëtare e u bë zë i fuqishëm i kauzës së drejtë dhe mbështetës i luftës çlirimtare. Kur atdheu kishte nevojë, ai nuk e kurseu as dorën, as zemrën; asnjëherë nuk kurseu asgjë nga vetja në shërbimin ndaj popullit dhe rinisë”, theksoi Grainca.
Ajo shprehet më se e nderuar, ndërsa takoi njeriun e urtë e të mbushur me dashuri për njerëzit dhe vendin.
“Ishte nder dhe kënaqësi e jashtëzakonshme të takohem me hoxhën Adem e të ndaj kohë me këtë njeri që rrallë hasim në jetë. Burrë i urtë, që çdo fjalë e ka të peshuar e të mirëmenduar dhe çdo këshillë të mençur, sikurse edhe çdo veprim të mbushur me dashuri për njerëzit dhe vendin tonë” thekson Grainca.
Për më tepër shprehet ajo se “Ai nuk kërkoi kurrë lavdi, por vetëm po lë pas trashëgimi të ndritur e fort të pasur. Shembulli i hoxhes Adem do të mbetet udhërrëfim i përhershëm për shumë breza si dhe dëshmi e gjallë se si jetohet me dinjitet; se si shërbehet me zemër dhe se si një jetë e tërë mund të shndërrohet në shërbim të fesë, dijes dhe atdheut”
