Në një nga intervistat e fundit në Pressing, Hajrulla Çeku – kandidat i partisë Vetëvendosje për kryetar të Prishtinës, ka kritikuar kundër-kandidatët e tij, në veçanti Uran Ismailin (PDK) dhe Përparim Ramën (LDK) se ‘i fshehin logot e partisë’ në garën e tyre. Uran Ismaili mbrëmë iu kundërpërgjigj Hajrulla Çekut…
Hajrulla Çeku, kandidati i partisë VV për kryetar të Prishtinës, në Pressing deklaroi para pak ditësh, se “vetëm ai dhe Bekë Berisha i AAK-së, nuk e kanë problem logon e partisë’.
“Këta të tjerët, po” – tha Çeku, duke iu referuar Uran Ismailit të PDK-së dhe Përparim Ramës të LDK-së.
“Problem me tregu me cilën parti garojnë. Të tjerët garojnë si kandidatë të pavarur. Nuk jam anëtar i partisë, e mshefë logon, nuk e tregon asnjëherë partinë, veç unë edhe Bekë Berisha nuk e kemi problem me tregu me cilën parti garojmë” – deklaroi Çeku në intervistë.
Uran Ismaili, kandidati i PDK-së për Prishtinën, mbrëmë në Pressingi është përgjigjur kësaj deklarate të Çekut, duke thënë se ‘logo e tij – është aty’ dhe se ‘logot nuk i kanë sjell ndonjë përfitim Prishtinës’.
“Logoja ime është aty, po përtej logove, mendoj që Prishtina nuk ka përfitu pse njerëzit kanë fitu me logo. Përkundrazi në Prishtinë, njerëzit kanë fitu me logo të partisë, por kjo nuk e ka garantu suksesin.
Përkundrazi, krejt ata besim që ia kanë dhënë asaj logo, e kanë kthy në një dëshpërim të madh për kryeqytetin.
Krejt këta njerëz, krejt këto logo që kanë qeveris në Prishtinë, janë në pozitë të disfavorshme. Tetë vite të VV-së dhe katër të Përparim Ramës, janë tepër tepër tepër të vështira për qytetarët e Prishtinës” – tha Ismaili.
Radha e Ramës
Radha për ta ‘parë’ në një intervistë, është e kryetarit aktual të Prishtinës dhe kandidatit Përparim Rama.
Ai nuk është marrë me asnjë prej deklarimeve të deritashme të kundër-kandidatëve të tij, qoftë për punën e logosë, qoftë për kritika të tjera, por në një reagim të para disa ditësh, ai akuzoi Ministrisë së janë kthyer në zyra fushate.
“Siç po e shihni edhe vetë, Ministritë i kanë kthyer në zyra fushate, fondet i mbajnë peng, dhe qytetarët i përdorin si mjet presioni politik!
Nuk po e fshehin më bllokadën e organizuar. E gjithë qeveria e tyre ishte dhe vazhdon të jetë e mobilizuar kundër Prishtinës, me një qëllim të thjeshtë, për ta marrë pushtetin me çdo kusht!
Për ta, suksesi i Kryeqytetit është dështimi i tyre partiak. Në vend që të bashkëpunojnë për të mirën e përbashkët, veprojnë si sabotatorë që mezi presin të shembin gjithçka, vetëm për të thënë “pa ne s’bëhet”.
Sot e kanë bllokuar buxhetin, vetëm sepse nuk janë vet në qeverisje. Nga ajo që paska thënë ministri u bë më se e qartë: meqë ata nuk qeverisin më Prishtinën, atëherë jeta e qytetarëve të Kryeqytetit nuk ka vlerë!” – shkruante Rama.
