I angazhuar në “Nations League” me Turqinë (me një gol ndaj Hungarisë nga penalltia), Hakan Calhanoglu nuk ndalon së menduari për Interin. Ai flet për objektivat sezonalë, duke qenë se zikaltrit janë ende në garë në të gjitha garat, por edhe për merkaton. Jo për të ardhmen e tij, por për atë të Arda Güler, i cili në javët e fundit është përfolur për një transferim tek Interi këtë verë.
“E kam thënë disa ditë më parë, do të shohim çfarë do të ndodhë, ai dëshiron të luajë më shumë”, – tha 31-vjeçari, duke bërë që tifozët zikaltër të ëndërrojnë për talentin e Real Madridit.
Sigurisht që tifozët e Interit do të ndihen të lumtur edhe nga fjalët e Calhanoglu për pjesën e fundit të sezonit. “Shpresojmë të fitojmë gjithçka, – tha ish-mesfushori i Milanit në një intervistë për “SportMediaset”. – Ne mundohemi ta përfaqësojmë Interin në mënyrën më të mirë të mundshme, kemi një përgjegjësi të madhe dhe e dimë këtë.
Në Itali kam fituar gjithçka, objektivi im është të fitoj Champions League. Ëndrra ime është të rikthehem në finale të këtij kompeticioni dhe këtë herë ta fitojmë. Ndoshta edhe të fitoj ‘Topin e Artë’. Pastaj ta ngremë sërish titullin e Serie A është diçka tjetër shumë e rëndësishme”.
Duke folur për shokët e skuadrës, mendimi i turkut shkoi për Kristjan Asllanin, që në letër është zëvendësi i tij tek Interi, por që ka marrë shumë kritika, disa prej të cilave të tepruara. Këtë e ka pranuar edhe vetë mesfushori shqiptar në një intervistë për “SportMediaset”, ndaj Calhanoglu u shpreh:“E falënderoj për ato që ka thënë. Ne jemi gjithmonë aty, ata me më shumë eksperiencë po ndihmojnë të tjerët. Kristjani ka një talent të jashtëzakonshëm, ka cilësitë për të luajtur tek Interi. Nuk është e lehtë për të, por ne po e ndihmojmë. Ai meriton më shumë. Kur ka pasur hapësirë, e ka bërë punën e tij dhe duhet të vazhdojë kështu”.
Në fund, një mesazh për tifozët që e kanë mbështetur në çdo moment: “Më kanë rritur jo vetëm si lojtar, por edhe si person. Jam pjekur më shumë, do t’i falënderoj gjithmonë për gjithçka që bëjnë, jo vetëm për mua, por për të gjithë ne.
Është e pashpjegueshme ajo që ata bëjnë, vetëm mund të përjetohet. Po përjetoj një moment të mrekullueshëm, tifozët tanë janë të jashtëzakonshëm. Në ‘San Siro’ na japin një forcë të madhe, duam t’i shpërblejmë me diçka të rëndësishme”.
A ishte për tifozët arsyeja pse nuk shkoi te Bayerni verën e kaluar? “Po”, – u përgjigj shkurt dhe prerë mesfushori turk.s.n.
