Ministri i Shëndetësisë, Arben Vitia, ka bërë të ditur se është hapur konkursi i Shkollimit Specialistik, i pari për këtë vit, teksa ka njoftuar se së shpejti do të hapet edhe i dyti.
Vitia ka thënë se konkursi si dhe vitin që shkoi është i ideuar në përputhje të plotë me nevojat e institucioneve shëndetësore, për sot dhe të ardhmen.
Ndërsa jep njoftimin, ministri Vitia sqaron se kriteret që i kanë përdorur për këtë raund të konkursit janë të lidhura me fushat ku ka mungesa të mjekëve specialistë, kapacitetet e stafi akademik e profesional për mentorim, si dhe pajisjet mjekësore dhe hapësirat në dispozicion.
“Për më pak se një vit po pranojmë 588 specializantë të rinj. Në qershor 2023 u pranuan 359 specializantë. Mars 2024 po shtohen dhe 229 specializantë të tjerë. Së shpejti edhe konkurs tjetër bazuar në nevoja dhe planifikim”,theksoi Vitia.
Tutje ministri është shprehur se nga 229 vende për specializantë, 53 prioritare janë me pagesë nga Ministria e Shëndetësisë, 1 nga Shërbimi Korrektues, 155 nga Kujdesi Parësor Shëndetësor dhe 20 vende për specializantë shqiptarë nga jashtë Kosovës.
