Në përvjetorin e rënies së heroit Agim Ramadani, kryetari i Aleancës për Ardhmërinë e Kosovës, Ramush Haradinaj, ka nderuar figurën e bashkëluftëtarëve të rënë në betejën e lavdishme të Kosharës.
“Agim Ramadani i dha vulë betejës së Kosharës, së bashku me Sali Çekaj e Xhemajl Fetahaj, duke e bërë atë unike dhe të pavdekshme,” ka shkruar Haradinaj.
Ai kujtoi trimërinë e pashembullt të komandant Katanës, duke e cilësuar si strateg dhe ndërtues të unitetit çlirimtar, që mbajti betimin për të mos vdekur pa luftuar, deri në frymën e fundit.
“I pari ushtar shqiptar që shkuli gurin e kufirit që ndante shqiptarët, ra heroikisht te Rrasa e Zogut, për të mbetur i gjallë në kujtesën e popullit dhe të shtetit të Kosovës”, shkruan Haradinaj.
Në postimin e tij, në Facebok , Haradinaj ka përkujtuar edhe bashkëluftëtarët e rënë në këtë betejë historike: Abush Loku, Bashkim Jasiqi, Ramiz Krasniqi, Rifat Çelaj, Arben Jusufi, Driton Veliu, Emri Curri, Harun Beka, Rifat Salihaj, Rrahman Tafa dhe Sylejman Shala.
