Kryediplomati i Shqipërisë, Igli Hasani, ka shkruar sot për seancën e Këshillit të Sigurimit të thirrur nga Serbia për shkak të veprimeve të fundit të Kosovës që lidhen me dinarin dhe mbylljen e strukturave paralele, përcjell KosovaPost.
Hasani përmes platformës ‘X’ është ndalur tek deklarata e Ambasadores amerikane, Linda Thomas-Greenfield, për sulmet akute ndaj sigurisë dhe stabilitetit që vijnë jashtë Kosovës.
“S’është e nevojshme vetëm të dënohet Banjska. Ne duhet të sigurohemi që ajo s’përsëritet kurrë më”, shkruan Hasani
Ai gjithashtu tha se Shqipëria qëndron me Kosovën sa i përket çdo kërcënimi nga jashtë, ndërkohë që ka potencuar se Shqipëria vazhdon të theksojë tek lidershipi i Kosovës rëndësinë e koordinimit me aleatët kryesor.
“Ndërsa qëndrojmë në krah të Kosovës në parandalimin e çdo kërcënimi të jashtëm, Shqipëria do të vazhdojë t’i nënvizojë udhëheqjes së Kosovës rëndësinë e koordinimit të ngushtë me aleatët e saj kryesorë”, ka shkruar Hasani.
