Ministrja e Drejtësisë, Albulena Haxhiu, i ka dërguar një letër ministres serbe të Drejtësisë, Maja Popoviq, me të cilën i ka kërkuar të transferohen në Kosovë qytetarët kosovarë të burgosur në burgjet e Serbisë, në mënyrë që të gjykohen në mënyrë të drejtë dhe të paanshme.
Përmes një postimi në platformën X, Haxhiu tha se qytetarët Nezir Mehmetaj, Hasan Dakaj, Sadik Duraku dhe Tefik Mustafa, po mbahen në burgjet serbe, raporton “Betimi për Drejtësi“.
“Javën e kaluar kam kërkuar nga ministrja serbe e drejtësisë që të transferohen qytetarët tanë që mbahen në burgjet serbe. Nezir Mehmetaj, Hasan Dakaj, Sadik Duraku dhe Tefik Mustafa duhet të kthehen në Kosovë për një gjykim të drejtë dhe të paanshëm nga autoritetet”, ka shkruar Haxhiu.
Më 6 qershor 2024, “Betimi për Drejtësi” raportoi se sipas Ministrisë së Punëve të Jashtme dhe Diasporës (MPJD), nga viti 2019 deri më tani janë arrestuar shtatë shtetas kosovarë. I arrestuari i fundit është Tefik Mustafa.
MPJD ka thënë se të arrestuarit në Serbi me akuzat për kinse krime lufte janë vizituar vazhdimisht si dhe janë përcjellë të gjitha seancat gjyqësore ndaj tyre.
