Vetëm Spanja na ka ardhur hakut më shumë. E pamundur të gjesh “mace më të zezë” për kombëtaren shqiptare sesa Anglinë, rivalin që do të jetë sot përballë nesh në startin e eliminatoreve të Kupës së Botës.
Fillim më të keq nuk mund të kishte, pasi në 6 ndeshje, “luanët” kanë fituar gjashtë herë, ndërsa ne kemi mundur të shënojmë vetëm një gol.
Futbolli nuk është shkencë ekzakte, dhe nuk mund të ketë përgjigje që të na thonë saktë se përse është kështu, kur të paktën Francën e kemi mundur një herë 1-0 në miqësore, dhe gjithashtu në miqësore I kemi marrë një barazim në fushën e saj.
Po ashtu, Gjermaninë, edhe pse na ka dërrmuar me 19 fitore, I kemi shkëputur një barazim në dhjetor 1967 në Tiranë, që kishte si pasojë eliminimin e nënkampionëve të botës nga finalet e Kampionatit Europian.
Italia gjithashtu na ka mundur gjithmonë, 5 herë, veçse golaverazhi nuk është katastrofë, e kemi 2 gola të shënuar e 9 të pësuar, ndërsa me anglezët plot 1 me 19!
Spanja, e thamë, “ha bukë veç” sepse ka 9 fitore, 0 barazime e 0 humbje me ne, si dhe golat 32-3!
Historia me Anglinë nisi në 8 mars 1989, në fushën e keqe të “Qemal Stafës”, që shpikësit e futbollit e fituan 2-0 me gola nga Xhons Barns dhe kapiteni Brajan Robson, nga një në çdo pjesë loje.
Dueli I dytë, në “Uemblin” e famshëm në versionin e vjetër të Stadiumit Perandorak, e humbëm 0-5, por ishte ajo ndeshje ku shkëlqeu Sulejman Demollari, me golin e anuluar pa shpjegim e pa të drejtë.
Do të kishte qenë për 1-1.
Në atë ndeshje spikati një yll I ri I Anglisë, Pol Gaskoin, që dha asistin e parë dhe shënoi golin e parë me kombëtaren.
Gjithsesi, trajneri Bobi Robson foli me ironi më pas.
“Po, ai luajti shumë mirë. Unë duhet të shpenzoj dy orë nesër me të që ta latoj paksa, dhe ta bëjë që të ketë më shumë besim, gjëja që I mungon. Në të vërtetë, sa herë që ai të jetë në fushë ne do të na duhen dy topa, një për të dhe një për skuadrën. Dua t’i them që të luajë në një pozicion të caktuar dhe të mos hallakatet. Pra ne kemi një dilemë me Gaskoinin, ndonëse ai është një talent shumë I çmuar”.
U desh të kalonin 12 vjet, dhe në 28 mars 2001, “tre luanët” dolën në “Qemal Stafa” dhe fituan 3-1.
Altin Rraklli shënoi golin e vetëm tonin ndaj tyre në histori për 1-2, ndërsa pati polemika për golin e anuluar që do të na kishte dhënë barazimin.
Për miqtë shënuan Ouen, Skoulls dhe Endi Koul, veçse pas 73’.
Në Njukasëll, kur në stol ishte I fundit trajner shqiptar I kuqezinjve, Sulejman Demollari, Anglia fitoi 2-0 me gola nga Ouen dhe Fauler.
Dy duelet e fundit janë histori e re, por me më pak emocion, shkruan abcnews.al.Anglezët fituan 2-0 në Arenën Kombëtare kur shënuan Harri Kejn dhe Maunt, si dhe triumfuan 5-0 në “Uembli”, ndërsa kuqezinjtë nuk e dhanë dot futbollin që bënin dikur.
