Mauro Icardi ndodhet në një situatë delikate me Galatasarayn. Sipas informacioneve nga Argjentina, klubi turk po shqyrton seriozisht mundësinë e ndërprerjes së kontratës me sulmuesin. Vendimi lidhet me një sërë sjelljesh të konsideruara të papërshtatshme, si në nivel personal, ashtu edhe profesional, që kanë acaruar drejtuesit e klubit turk.
Icardi, aktualisht në proces rikuperimi, pas një dëmtimi në gju, thuhet se është thirrur për mbledhje urgjente me drejtuesit e klubit.
Sipas Juan Etchegoyen në programin televiziv argjentinas “Mitre Live”, Galatasaray i ka dhënë një ultimatum sulmuesit: “Ose përqendrohesh plotësisht në rikuperimin tënd në Turqi, ose kontrata do të të ndërpritet”.
Klubi ka kërkuar që lojtari të ndjekë një program të rreptë rehabilitimi, gjë që, sipas informacioneve, nuk po ndodh. Përveç problemeve që lidhen me rikuperimin fizik, sjelljet jashtë fushës të Icardit e kanë përkeqësuar situatën. Disa nga arsyet kryesore që kanë çuar klubin në pikën e mosdurimit janë:
Thashetheme dhe skandale personale. Icardi është i përfshirë në një mosmarrëveshje ligjore me ish-bashkëshorten e tij, Wanda Nara, që përfshin akuza të rënda për shantazh, kërcënime dhe dhunë në familje.
Pjesëmarrje në festa. Së fundmi, sulmuesi mori pjesë në një event të njohur si “Bresh Party” në Mar de Plata, ku thuhet se kaloi tërë natën duke festuar, çka e dëmton më tej imazhin e tij në sytë e drejtuesve turq.
Shqetësime nga lidhja e re. Marrëdhënia e tij me aktoren dhe këngëtaren argjentinase China Suarez duket se ka ndërlikuar më tej situatën, pasi Icardi e ka shoqëruar atë në disa angazhime pune në Argjentinë, në vend që të fokusohej te rikuperimi.
Sipas lajmeve të fundit, për të shmangur largimin, Icardi ka pranuar të kthehet në Turqi dhe të rifillojë programin e tij të rehabilitimit. Megjithatë, transferimi i partneres së tij të re, China Suarez, po paraqet vështirësi për shkak të kundërshtimit nga baballarët e tre fëmijëve të saj, të cilët nuk miratojnë zhvendosjen e tyre në Europë.
Megjithëse kontrata e Icardit me Galatasaray është e vlefshme deri në vitin 2026, e ardhmja e tij në klubin turk është në rrezik. Drejtuesit ia kanë bërë të qartë se nuk do të tolerojnë më asnjë shpërqendrim, duke e vënë lojtarin përballë një zgjedhjeje të qartë: futbollin ose problemet personale.s.n.
