Policia e Kosovës në koordinim me Agjencinë Kosovare të Inteligjencës kanë identifikuar dy lokacione ku kanë qenë të vendosura kamerat vëzhguese të kamufluara për monitorim të lëvizjes së qytetarëve, institucioneve të Qeverisë dhe prezencës ndërkombëtare.
Një gjë të tillë e ka bërë të ditur për RTKlive zëvendësdrejtori i Policisë së Kosovës për rajonin e veriut, Veton Elshani.
“Me datë 27.06.2024, Policia e Kosovës në bashkëpunim të ngushtë me AKI, kanë identifikuar dy lokacione në të cilat kanë qenë të vendosura kamerat vëzhguese të kamufluara për monitorim të lëvizjeve të qytetarëve, institucioneve të Qeverisë së Republikës së Kosovës dhe prezencës ndërkombëtare në veri të vendit”, ka theksuar Elshani.
Sipas tij këto kamera dyshohet se janë përdorur në vazhdimësi nga institucionet e sigurisë së Serbisë.
“Lidhur me këtë rast janë të identifikuar dy persona të cilët janë me interes që të intervistohen nga ana e jonë”, ka shtuar ai.
