SSP pretendon se Gjillas dhe Alleksiq u sulmuan nga aktivistë të Partisë Progresive Serbe (SNS) në pushtet, raporton Radio Evropa e Lirë, edicioni serbo-kroatisht, shkruan Klankosova.tv.
Nga ana tjetër, SNS-ja pretendon të kundërtën – se Gjillas i ka sulmuar aktivistët e tyre.
Çfarë tha SSP?
Sipas SSP-së, Gjillas dhe Alleksiq u sulmuan pas mesnatës së 20 dhjetorit në lagjen ku jeton Gjillas, kur iu afruan një grupi burrash që po vendosnin postera fyes.
Në posterat shkruhej “Gjillas hajduti”.
SSP ka postuar një video të ngjarjes në rrjetet sociale.
Në një deklaratë të transmetuar nga televizioni N1, Gjillas tha se ai dhe Alleksiq iu afruan një grupi burrash për t’i pyetur ata pse po i vendosnin ato postera.
“Deri sonte kam menduar se të qenit deputet dhe lider i partisë opozitare më ka mbrojtur – me sa duket ata nuk ikin nga asgjë”, shtoi ai.
Gjillas dhe Alleksiq janë ekzaminuar në Qendrën Emergjente pas incidentit.
Alleksit deklaroi se burrat i sulmuan, e rrëzuan Gjillasin në dysheme dhe e shkelmuan.
“U shtriva mbi të, dhe ata vazhduan të na godasin bashkë. Në video shihet se si njerëzit bien për toke nga goditjet me forcë, sikurse që tregohet se askush nuk ka ardhur për të rrahur askënd, ju mund të shihni që unë i mbaj duart lart, se po përpiqem të parandaloj që të ndodhte diçka më e keqe, por ata sulmuan të parët. Ne u mbrojtëm, këtë mund ta shihni në video”, tha Alleksiq.
SSP pretendon se grupi i burrave drejtohej nga Lluka Petroviq, sekretar i qytetit për investime në Beograd dhe anëtar i presidencës së SNS-së.
Në një konferencë për shtyp, Petroviq mohoi se aktivistët e SNS-së sulmuan Gjillasin dhe një anëtar të partisë së tij.
Çfarë tha SNS?
Petroviq deklaroi se konflikti ka ndodhur gjatë “aksioneve më normale partiake” të ngjitjes së posterave të kryera nga të rinjtë e SNS-së.
Ai pretendon se goditjen e parë e ka bërë Gjillasi dhe se njëri prej aktivistëve të SNS-së ka pësuar tronditje.
Petroviq u tha gazetarëve në ambientet e partisë se incidenti ndodhi 30 minuta pas mesnate në rrugën “Vojvode Stepe” në Beograd.
Ai deklaroi se të rinjtë e SNS-së po “rrinin të qetë” në rrugë dhe kishin vendosur postera duke shkruar “Gjillas hajduti” kur u shfaq Gjillasi.
“Nuk kanë prekur askënd, nuk kanë provokuar askënd, kanë bërë punën e tyre partiake”, ka shtuar ai.
Ai hodhi poshtë pretendimet se aktivistët e SNS-së sulmuan të parët, duke thënë të kundërtën.
“Goditjen e parë e ka bërë Dragan Gjillas drejtpërdrejt tek unë”, ka thënë Petroviq.
Kryeministri serb dhe presidenti i SNS-së, Millosh Vuçeviq, ka reaguar në rrjetet sociale, duke thënë se “incidentin e ka nisur Gjillasi”.
“Ai sulmoi të rinjtë vetëm sepse nuk i pëlqenin aktivitetet e tyre, të cilat i kryejnë aktivistët e të gjitha partive”, pohon Vuçeviq.
Policia nuk i është përgjigjur pyetjes të Radios Evropa e Lirë në lidhje me këtë incident deri në publikimin e lajmit. /REL
