Tek Interi, fokusi i tanishëm është i përqendruar plotësisht te fundi emocionues i sezonit, me objektivin për të fituar si titullin e Serie A ashtu edhe Ligën e Kampionëve. Megjithatë, në prapaskenë vazhdon të marrë gjithnjë e më shumë vëmendje e ardhmja e trajnerit Simone Inzaghi.
Në pritje të zhvillimeve nga Appiano Gentile për rinovimin e kontratës së tij, nga Arabia Saudite vijnë lajme për një tjetër sulm serioz nga Al Hilal ndaj teknikut zikaltër. Sipas medieve arabe, klubi saudit ka vënë mbi tavolinë një ofertë “monstruoze” prej 20 milionë eurosh neto në sezon për ta bindur Inzaghin që të marrë drejtimin e skuadrës që tashmë është kualifikuar për në Kupën e Botës për Klube.
Edhe pse në fillim familja e Inzaghit ishte skeptike, përmasa financiare e ofertës ka bërë që trajneri të nisë reflektime serioze. Madje thuhet se një përfaqësues i tij ka udhëtuar drejt Riadit për të bërë një “vizitë eksploruese”, për t’u informuar mbi jetesën, strehimin dhe sistemin arsimor, një shenjë që oferta po merret në konsideratë.
Presidenti i pasur dhe ambicioz i Al Hilal, Fahad Bin Saad Bin Nafel, e dëshiron me ngulm Inzaghin në krye të ekipit dhe duket se është gati ta përmbyllë marrëveshjen personalisht. Mediet arabe raportojnë se një takim mes palëve është planifikuar për më 1 qershor në Riad, menjëherë pas finales së Champions-it. Aty pritet të diskutohet dhe të finalizohet çdo detaj, përfshirë bonuset dhe kushtet e kontratës.
Në prill kishte pasur një kontakt të parë mes Inzaghit dhe Al Hilal, por bisedimet u ftohën shpejt. Tani megjithatë, presioni saudit është rikthyer më i fortë dhe më joshës se kurrë, dhe ndonëse familja e trajnerit ende ka rezerva, gjithçka mund të ndryshojë pas finales europiane. Interi duhet të bëjë kujdes pas sezonit më të suksesshëm të viteve të fundit, mund të përballet me një humbje të madhe në pankinë.s.n.
