Dy fitore radhazi, me Inter që vijon të ndjek “këmba këmbës” Napolin duke kaluar presionin tek ekipi i Contes. Zikaltërit kaluan pa shumë vështirësi Parmën, dolën me 3 pikë pas suksesit 3-1.
Në “Meazza”, ekipi i Simone Inzaghi-t vuajti pak në fillim për të gjetur golin e avantazhit, ishin dhe të pafat si në rastin e Dumfreis, me holandezin që goditi traversën. Në fundin e pjesës së parë, në minutën e 40-të, Dimarco me një veprim të bukur në zonë kaloi Inter në avantazh, për anësorin zikaltër ky ishte goli i tij i parë në këtë sezon të Serie A.
Me fillimin e pjesës së dytë, Barella mori një super assist nga Mkhitaryan duke dyfishuar shifrat, një aksion fantastik, i konfirmuar me VAR. Në minutën e 67-të, ishte Thuram që i vetëm në shtyllën e dytë realizoi edhe golin e tretë për Inter. Simone Inzaghi hodhi në fushë edhe Kristjan Asllanin nga minuta e 71-të, me mesfushorin kuqezi që mori vendin e Calhanoglu-s. Në fund, në minutën e 81-të, Darmian dërgoi topin në rrjetë, një autogol i pafat që sigloi shifrat në 3-1.
Për sa kohë ishte në fushë, Asllani zhvilloi një paraqitje pozitive, i vlerësuar nga mediat me notën 6.
Simone Inzaghi u shfaq i kënaqur për këtë sukses, ndërsa ishte e pashmangshme dhe një koment për deklaratat e Contes: “Jam shumë i kënaqur, realizuam dhe dy gola të bukur. Më vjen keq vetëm që nuk shënoi Martinez, por duhet të vazhdojë kështu, jam i kënaqur me paraqitjen e tij. Fjalët e Conte për grupin e madh të lojtarëve? Unë kam 25 lojtarë dhe jam i dashuruar pas tyre. Në këto tre vite e gjysmë kemi bërë një rrugëtim fantastik, jam shumë krenar”, u shpreh Inzaghi.bw.
