Lufta mes Rusisë dhe Ukrainës po vazhdon, ndërsa viktimat s’kanë të ndalur. Prej tyre, ishin të panumërt edhe sportistët që janë vrarë nga të dy palët.
I fundit që u vra në këtë luftë është ish-futbollisti i Rusisë, Aleksei Bugayev.
Lajmin e ka bërë të ditur babai i të ndjerit, Ivan Bugayev.
“Për fat të keq, lajmi për vdekjen e birit tim është i vertetë”, tha ai.
Për vdekjen e 43 vjeçarit kanë shkruar mbrëmë edhe mediat në Rusi, ndërsa Bugayev ishte njëri nga viktimat e shumta ruse në luftën që po e zhvillon Rusia për pushtimin e Ukrainës.
Mediat ruse raportojnë se Bugayev, i cili i kishte zhvilluar shtatë ndeshje për Kombëtaren e Rusisë, përfshirë këtu edhe atë ndaj Cristiano Ronaldos e Rui Costas me shokë, ishte rekrutuar në forcat ruse derisa ishte në burg. Kishte luajtur në Euro 2004 me Rusinë, ndërsa ish-mbrojtësi kishte luajtur me ekipet Lokomotiv Moska e Krasnodar,shkruan Gazeta Express. Ai ishte arrestuar vitin e kaluar në tentim për trafikim të drogës, ndërsa në shtatorin e këtij viti e kishte marrë dënimin prej nëntë vjetësh e gjysmë.
