Largimi nga një vend i punës në shumë raste përcillet me pakënaqësi e hatërmbetje nga punëtorët. E ata shpesh herë eskalojnë në fjalë të rënda ndaj eprorëve, të cilët i kërcënojnë se do t’i qërojnë hesapet për veprimet e marra, duke bërë kështu që intervenimi i Policisë të jetë i domosdoshëm.
Kështu dyshohet të ketë vepruar edhe një ish punëtor i Kompanisë Rajonale të Ujësjellësit në Mitrovicë ‘Uniteti’, i cili ka kërcënuar drejtorin, Gazmend Morina.
Burimet brenda Prokurorisë kanë bërë me dije se Morina ka denoncuar rastin në Polici, pasi dyshohet se ka pranuar mesazhe me përmbajtje kërcënuese.
E gjithë kjo dyshohet të jetë bërë me motive inati kundrejt Morinës, për të cilin i dyshuari A.Sh, ka deklaruar se e ka larguar nga puna.
Si rezultat i denoncimit, i dyshuari është shoqëruar në stacion policor për intervistim, ku ka dhënë dëshminë e tij lidhur me rastin.
Pas përfundimit të procedurave policore, Prokurori i Shtetit ka urdhëruar që 41-vjeçari të hetohet në liri nën dyshimet për kryerjen e veprës penale ‘Kanosje’.
Ndërkohë Sinjali ka provuar që të kontaktojë me Morinën për të marrë një prononcim lidhur me atë që ka ndodhur, mirëpo i njëjti nuk është përgjigjur në telefonatat tona.
