Ministrja e Industrisë, Tregtisë dhe Ndërmarrësisë, Rozeta Hajdari, ishte dënuar me gjobë 700 euro nga Gjykata Themelore në Prishtinë për mos deklarim të pasurisë ër vitin 2020.
Në një konferencë për media pas dënimit, ministrja Hajdari kishte thënë se deklarimi i pasurisë me kohë i ka ikur pa dashje.
“Faleminderit për pyetjen, sot jam për raportin e sukseseve, por më lejoni t’ju njoftoj që ky vendim që erdhi dje nga gjykata për këtë dispozitë, ka baza për elementin e faktorit kohë, që ka ikur pa dashje gjatë vitit 2020, në kohën me pandemi”- ishte përgjigjja e ministres Hajdari.
Fatmirësisht një gjë e tillë nuk i ka ikur ministres Hajdari këtë vit.
Ministrja Rozeta Hajdari ka deklaruar në Agjencinë për Parandalimin e Korrupsionit se posedon një banesë me vlerë 56 mijë e 100 euro në pronësi të përbashkët, ndërsa tek pasuria e luajtshme, ajo ka deklaruar një veturë me vlerë 3 mijë e 100 euro.
Tek zotërimi i aksioneve, Hajdari ka deklaruar 100% të aksioneve të një ndërmarrje individuale, mirëpo nuk ka cekur vlerën e tyre.
Tek të hyrat vjetore ministrja Hajdari ka deklaruar pagën e saj me vlerë 15 mijë e 229 euro, gjithashtu i ka deklaruar edhe mëditjet që i ka marrë për vitin 2022 për udhëtime zyrtare jashtë vendit, ku vlera e tyre e përbashkët është 1 mijë e 729 euro.
