Shkup, 26 Korrik 2025 – Me rastin e shtatëvjetorit të ndarjes nga jeta të Adem Demaçit, figura të shumta politike e shoqërore kanë kujtuar veprën dhe kontributin e tij të pazëvendësueshëm për çështjen kombëtare shqiptare. Ndër ta, edhe Izet Mexhiti, njëri prej liderëve politikë shqiptarë në Maqedoninë e Veriut, ka bërë homazh për Demaçin, duke e cilësuar atë si një “zë të ndërgjegjes kombëtare që nuk u lodh kurrë së kërkuari drejtësi, raporton Kosova Post.
“Në një kohë kur frika kishte gozhduar shumicën, Adem Demaçi guxoi të fliste. Ai nuk ishte thjesht një intelektual apo aktivist – ai ishte vetë fryma e rezistencës shqiptare,” – deklaroi Mexhiti.
Sipas tij, Adem Demaçi ishte model i pathyeshmërisë morale dhe shembull i sakrificës pa kompromis për idealin kombëtar. “Demaçi nuk bëri asnjëherë kompromis me të keqen. Ai zgjodhi burgun, në vend të heshtjes. Ai zgjodhi të qëndrojë në anën e drejtë të historisë, kur kjo ishte më e vështirë se kurrë,” – theksoi Mexhiti në deklaratën e tij.
Izet Mexhiti përfundoi me një thirrje që brezat e rinj të mos e harrojnë kurrë figurën e Adem Demaçit dhe të vazhdojnë të mësojnë nga përkushtimi i tij. “Demaçi nuk është vetëm pjesë e historisë sonë – ai është dritë e rrugës sonë për të ardhmen.”
