Marrëveshja e paqes mes Izraelit dhe Hamasit mund të jetë çështje orësh ose ditësh. Negociatorët takohen sërish të martën në Katar në përpjekjen për të finalizuar armëpushimin në Rripin e Gazës dhe lirimin e 34 pengjeve izraelite.
Një zyrtar palestinez i afërt me negociatat tha për BBC se për herë të parë që prej fillimit të luftës, delegacionet nga Izraeli dhe Hamasi po zhvillojnë bisedime indirekte në të njëjtën godinë. Thuhet gjithashtu se milicia që udhëheq Rripin e Gazës ka hequr dorë nga kushti që trupat e Netanjahut të largohen nga territori i tyre.
Presidenti amerikan Joe Biden tha se marrëveshja ishte mjaft e afërt. Një zyrtar izraelit tha gjithashtu për agjencinë e lajmeve Reuters se ujdia mund të arrihej brenda disa orëve ose ditëve.
“Sa i përket luftës mes Izraelit dhe Hamasit, jemi në prag të finalizimit të marrëveshjes. Fola të hënën me kryeministrin e Izraelit, me emirin e Katarit, dhe mezi pres të flas me presidentin Abdel Fattah el- Sisi. Po shtyjmë fort për ta mbyllur këtë çështje. Marrëveshja qe propozuam ne, do të lirojë pengjet, do të ndërpresë luftimet dhe do të ofrojë siguri për Izraelin dhe do të na lejojë të shtojmë ndihmat humanitare në Gaza”.
Sinjalet pozitive vijnë pas kërcënimeve të presidentit të zgjedhur Donald Trump se Hamasin e pret ferri, nëse ujdia nuk arrihet në kohë, para inaugurimit të tij në 20 janar. Palët janë dakordësuar se Hamasi do të lirojë 3 pengje në ditën e parë të marrëveshjes, pas së cilës Izraeli do të fillojë të tërheqë trupat nga zonat e populluara. Shtatë ditë më vonë, Hamasi do të lirojë 4 pengje të tjera dhe Izraeli do të lejojë personat e shpërngulur në jug të rikthehen në veri, por vetëm duke u zhvendosur në këmbë.
Automjetet, do të lejohen të lëvizin vetëm përmes një kalimi, nën monitorimin e një pajisje me rreze X e operuar nga një ekip sigurie, i Katarit dhe Egjiptit. Ujdia parashikon qëndrimin e trupave izraelite në korridorin Filadelfi dhe ruajtjen e një zone neutrale prej 800 metrash përgjatë kufijve lindorë dhe veriorë, në fazën e parë, shkruan A2CNN. Izraeli ka pranuar gjithashtu të lirojë 1 mijë të burgosur palestinezë në këmbim të 34 pengjeve. Negociatat për fazën e dytë dhe të tretë të marrëveshjes do të nisin në ditën e 16 të armëpushimit
