Ndonëse mbi 200 raketa fluturuan gjatë natës mbi Izrael, ushtria e shtetit hebre priti derisa të përfundonte alarmi për të vijuar me operacionet e tij kundër militantëve të Hamasit në Gaza dhe atyre të Hezbollahut në Liban.
Disa orë pasi “Iron Dome” eliminoi rrezikun që vinte nga përtej kufirit, ushtria izraelite bëri një thirrje për banorët e dy lagjeve në Bejrut që të evakuohen sa më shpejt që të jetë e mundur.
30 minuta më vonë IDF nisi sulme në Daniyeh, një zonë, ku të premte u eliminua me anë të një rakete dhe lideri i Hezbollahut, Hassan Nasrallah.
Sipas New York Post, Izraeli ka mundur që gjatë sulmeve të fundit të shkatërrojë më shumë se gjysmën e armatimit që Hezbollah dispononte dhe që e kishte mbledhur për më shumë se 30 vite. Për këtë arsye grupimi terrorist ka shtrirë dorën për ndihmë drejt Iranit financues.
Ndërkohë, një sulm ka pasur dhe ndaj një shkolle në qendër të Gazës, ku ushtria izraelite deklaron se shkatërroi një bazë të Hamasit, nga ku përgatiteshin akte terroriste ndaj IDF dhe shtetit hebre.
Sipas mediave vendase, raporton A2, ndonëse trupat izraelite deklaruan se u treguan të kujdesshëm për të shmangur fatalitetet në radhët e civilëve, 9 prej tyre humbën jetën kur shkolla u sulmua.
