Presidentja e Komisionit Europian, Ursula von der Leyen, ka thënë se 800 miliardë euro do të mobilizojë për rritjen e aftësisë mbrojtëse të Europës.
“Europa është e gatshme të marrë përsipër përgjegjësitë e saj. Riarmatosja e Europës mund të mobilizojë afër 800 miliardë euro për një Europë të sigurt dhe të qëndrueshme. Do të vazhdojmë të punojmë ngushtë me aleatët tanë në NATO. Ky është një moment për Europën. Dhe ne jemi gati”, tha ajo.
Deklarata e saj vjen në mes të zhvillimeve me SHBA-në, e cila me Administratën e re Trump ka kërkuar nga Europa që të rrisë shpenzimet e mbrojtjes dhe të marrë përgjegjësi për sigurinë e saj, raporton Gazeta Express.
Komisioni Europian sot propozoi një hua të re të përbashkët të BE-së prej 150 miliardë euro për t’i dhënë hua qeverive të shteteve të BE-së për mbrojtje, si pjesë e një përpjekjeje totale prej 800 miliardë eurosh financash për të rritur aftësitë mbrojtëse të Europës.
150 miliardë euro e huamarrjes së re të përbashkët do të shkojë drejt ndërtimit të fushave pan-europiane si mbrojtja ajrore dhe raketore, sistemet e artilerisë, raketat dhe municionet, dronët dhe sistemet anti-drone ose për të adresuar nevoja të tjera nga kibernetika, tha Komisioni.
“Ne jemi në një epokë riarmatimi”, tha von der Leyen në një konferencë shtypi përpara se të përshkruante planet.
Fjalimi i saj i shkurtër për mediat erdhi 48 orë përpara një samiti me liderët të enjten, në të cilin do të diskutohen propozimet.
Plani përfshin tre propozime:
- Lejimi i vendeve për të rritur shpenzimet e mbrojtjes pa nxitur mekanizmat e BE-së kundër deficiteve buxhetore
- 150 miliardë euro në kredi për investime në mbrojtje në fusha që mund të përfitojë mbrojtja e BE-së në tërësi
- Lejimi i vendeve që të ridrejtojnë fondet e destinuara për programet e politikës së kohezionit (d.m.th. politikat që synojnë të rrafshojnë dallimet midis rajoneve më shumë dhe më pak të favorizuara) në shpenzimet e mbrojtjes.
