Gazeta izraelite Jerusalem Post konfirmoi se një oficer i inteligjencës izraelite kishte dhënë dorëheqjen për atë që ai e quajti një “dështim total” për të parashikuar sulmin e 7 tetorit nga Hamasi, transmeton Kosova Post.
Gazeta izraelite e përshkruan dorëheqjen e parë të këtij lloji si një “ngjarje të madhe” dhe pret që ajo të hapë rrugën për dorëheqje të tjera midis personelit ushtarak të rangut më të lartë.
Megjithëse ky oficer izraelit ishte përgjegjës për nënvlerësimin e kërcënimit të një “pushtimi të Hamasit” të zonës rreth Rripit të Gazës, gazeta shpjegon se kjo ishte pjesë e një tendence shumë më të gjerë brenda shërbimeve izraelite të sigurisë dhe ushtarake, të cilat konsideronin se “Hamasi nuk paraqesin një kërcënim të menjëhershëm”.
Hetimi do të zgjasë me muaj
Jerusalem Post shton se shefi i shtabit të ushtrisë izraelite Herzi Halevi, drejtori i Shërbimit të Sigurisë së Brendshme (Shin Bet) Ronen Bar dhe shefi i Inteligjencës Ushtarake Aharon Haliva gjithashtu morën përgjegjësinë për dështimin për t’iu kundërvënë sulmit të Hamasit, duke sinjalizuar gatishmërinë e tyre për të dhënë dorëheqjen.
Sipas parashikimeve të ekspertëve, drejtuesit kryesorë të sigurisë dhe ushtarakëve nuk do të nxitojnë të japin dorëheqjen derisa lufta në Gaza të vazhdojë, pasi kjo mund të çojë në komplikime pas ngjarjeve të 7 tetorit të vitit të kaluar, shkruan gazeta.
Jerusalem Post shton se një hetim për atë që ndodhi do të zgjasë me muaj, pasi kryeministri Benjamin Netanyahu përpiqet të fajësojë të tjerët për fiasko të 7 tetorit dhe të parandalojë çdo hetim që mund ta përfshijë atë.
