Policia e Kosovës, në bashkëpunim me njësitin e KFOR-it, ka ndaluar dy persona të cilët kishin hyrë ilegalisht në territorin e Kosovës nga Serbia, përgjatë vijës kufitare në zonën e Zveçanit.
Sipas raportit policor, gjatë një operacioni të vëzhgimit me dron, njësitet patrulluese kanë identifikuar dy persona të dyshuar duke kryer prerje të paautorizuar të pyjeve në territorin e Kosovës. Menjëherë pas lokalizimit, njësitet e Policisë dhe KFOR-it kanë ndërhyrë dhe kanë arritur t’i ndalojnë të dyshuarit, të dy meshkuj, shtetas të Serbisë.
Gjatë kontrollit, atyre u janë konfiskuar dy moto-sharra, një palë dylbi, një radiolidhje dhe një thikë. Të dyshuarit janë shoqëruar në stacionin policor për procedura të mëtejme.
Me vendim të prokurorit kompetent, pas intervistimit, të dyshuarit janë liruar në procedurë të rregullt, ndërsa mjetet e konfiskuara u janë kthyer.
