KEDS-i ka filluar implementimin e projektit më të ri për ndërrimin e njehsorëve elektrikë-atyre mekanikë dhe digjitalë te konsumatorët shtëpiakë.
Arsyeja e ndërrimit të këtyre njehsorëve është se akoma disa konsumatorë kanë njehsorë mekanikë nëpër shtëpitë e tyre, ndërkaq një numër tjetër i konsumatorëve posedojnë njehsorë digjitalë, të cilët kanë një afat të caktuar përdorimi.
Për realizimin e këtij projekti, KEDS-i ka arritur marrëveshje me një nënkontraktor, i cili numëron mbi tridhjetë ekipe që po operojnë gjithandej nëpër Kosovë në ndërrimin e këtyre njehsorëve.
Këto ekipe, të cilat po ndërrojnë mesatarisht 600 njehsorë në ditë, janë të pajisura me uniforma të KEDS-it, porse janë të identifikuara si KONTRAKTORË. KEDS-i kërkon mirëkuptim nga konsumatorët që të mos i pengojnë këto ekipe të autorizuara në ndërrimin e njehsorëve. Në të kundërtën, në rast të kundërshtimit të ndërrimit të njehsorëve, KEDS-i ka arritur një marrëveshje edhe me Policinë e Kosovës për intervenim në raste të tilla.
Pas ndërrimit të secilit njehsor elektrik, konsumatorit i lëshohet në vend një procesverbal si dëshmi e ndërrimit të tij, i cili përmban të gjitha detajet mbi njehsorin e ri.
Ndërrimi i këtyre njehsorëve elektrikë po implementohet sipas planit, përmes së cilit parashihet të ndërrohen 100,000 sosh përgjatë këtij viti, duke u bazuar në listën që KEDS-i i ka ofruar kompanisë së kontraktuar, gjithnjë duke qenë nën monitorim të ekipeve përkatëse të KEDS-it.
Ndërrimi i këtyre njehsorëve është i rëndësishëm, meqë siguron vazhdimësinë e matjes së saktë të konsumit të energjisë, gjë që u ndihmon konsumatorëve të kenë kontroll në kohë mbi shpenzimet e tyre.
Ky projekt i rëndësishëm është i bazuar në ligjet në fuqi për energjinë, rregulloret dhe udhëzimet që derivojnë nga to dhe, si i tillë, do të vazhdojë edhe vitet në vijim deri në ndërrimin e plotë të tyre./Kosova Post/
